U Dolloi ka Elaka Jowai, u Puramon Kynjing da pynsñiaw u yei mynsien wa sñiawsuk sñiawkmen ha kani ki samoi yong ka Behdieñkhlam heiwa da ong u wa ka Elaka Jowai kynthup ko ya ki soo tylli ki Raij wei kitæ toh ka Raij U Kongwasan Chyrmang, ka Raij Jowai, Raij Tuber wa ka Raij Ialong kiwa em ya ki sarin wow pyndep ya ka niam Behdieñkhlam.
Da ong u wa na pyrdi kini, ka Raij Tuber toh kawa em boon dooh ki chnong wa chimbynta hei wow pyndep ya kani ka niam neibhah wa em ko hadooh 29 tylli ki chnong East wa West Jaiñtia Hills.
Da pynsñiaw u leh wa i mynsien wa kmen neibhah wa hadien 2 snem wa hap pynduna ya kiwa chimbynta ki paidbah, ha uni u snem won da yoh biang u lehkmen kamwa jooh kam ha ki por nachwa.
Hajrong ini waroh u Dolloi da ngait skem u wa dei yarap ki Blai ki Syiem, i chaad Behdieñkhlam wa da pynman hajrong ka yurim wow wanrah ya i chait i khiah, i roi i par, i man khih man khan, wei wow bæh yei sih wa boonjait u man iwa jop lyngba i pyndepya kani ka lehniam.
Hawa khyruiñ won u cha ka sngi wa khaddooh ka Behdieñkhlam ka Raij Tuber ka wow man ha kani ka 22 tarik uni u bnai, da e khublei u ya kiwa yahkhmat na ki chnong wa em bynta u pyllai bait ya ka lehniam khamtam ki waheh Raij kam u Langdoh u Riblai chirup ki Wasan kiwa pyndep niam, ki Tymmen chirup ki Secretary ki Seiñraij wa em hapoh ka Raij Tuber.
Da ngait skem u wa lyngba kani ka lehniam daw yoh ya i kyrkhu wa da angnood, kamjooh leh i bha i miat wa i suk i saiñ ka pteiñ, hadien wa pyndep ya ka Behdeiñkhlam.
