Ka HYC East Jaiñtia Circle da yachem ko wa u DMHO wa u DC ka District deiwa e lang ya ka dorkhat yow dawa pynheh wei pynbha pynmiat yei chakri wa da e da ka Khliehriat Civil Hospital kawa dang dep pynku kyrdan wot cha na ka CHC ha u Thohlakhmi (Feb) uni u sem kam ka 100 Bedded Khliehriat Civil Hospital.
Kamtæ da ong wa ym em booh bhah ka poisa heiwa ym em poisa yow thied ya ki tiar ki tar wa emkaam wei katkam ka RTI wa da yoh na u DHMO, kani ka Hospital ym em ko ya ki Doctor kam ki Gynecologist, Anesthetist, Dermatologist, ki O.T. Technician, Lab Technician wa kiwi de wa emkaam yow man kani ka thaw sumaar wa pura kamwa da toh u man.
Lyngba ka RTI da chem leh wa kani ka Hospital chniam ko u booh 84 tylli ki pyllong heiwa 54 tylli toh ha ka Main Building wa 30 tylli ha ka Khliehriat CHC Old Building.
Kamtæ da ong wa ini da pynsuba ko wa i pynku kyrdan ya kani ka CHC cha ka Civil Hospital yoo lakam i kaam Politics donhi yow pynbiej paidbha chwa ka Election.
