Shillong: U Union Minister of State ka Home Affairs u Nityanand Rai da ong u wa i pynroi, i pynku yaka thaaiñ mihsngi man ko ka thong yong ka sorkar ha i yahkhmat u Prime Minister Narendra Modi. Ya ini da ong u Nityanand Rai haka sien wa nyngkong wa hiar kjat u ha Headquarters Directorate General, Assam Rifles, Shillong kam chibynta ka Annual Assam Rifles Commanders’ Conference ynnin ka 20 tarik.
Hawa yaklam u wa kiwa pathai khubor, u Minster da ong u wa ka thaaiñ North East katni da kylla dur bha ko ha kini ki 5 snem wa da dep nei kreh chitom ka sorkar pyrdi. Da ong u leh wa ka North East katni da ye ko wow pyntohbor wow yakob haka kyrdan National wa International ha kiwa boon ki kaam nadooh ki Sports, ka tem ka put, ka puræ puthi, ki luti syngkeiñ wa kiwi kiwi.
Da klam u chaphang ka spah wa da kyrkhu da ka rymaw ya kani ka thaaiñ waroh kawi deiwa ong leh wa lada pynemkaam hok ya ki daw ye u sdang ya kiwa boon ki karkhana wei i biang ki sarok katni da pynwiar ko ya iwa khang laad wow pynku yaka roi ka paar kani ka thaaiñ nachwa. Chooh chooh da ong u wa i pynsmat ka sorkar wow wanrah yaki kaam pynroi daw pynman ko yaka North East kam kawi na ki nongmuna ya ka ri waroh kawi wow pynbood leh ha kiwi ki bynta ka ri yow wanrah ya kama kani ka jooh ka roi ka paar.
Ha kani ka sngi da leh burom ya u Minister daka Ceremonial Guard of Honour kiwa kynthup lang ya chynrang wa kynthai ki chipai ka Assam Rifles. Hadien da leh warom u leh ya ki chipai wa da e yei mynsien yong ki neibynta ka ri ha Laitkor War Memorial.
U Minister da chimbynta lang u haka Special Sainik Sammelan kawa da emlang ki heh chipai Assam Rifles kiwa wan na waroh ki kyrdan. Hawa e u yei klam da yaroh u yaka Assam Rifles ya i kaam yong ka wow yada ya ki thaw ka ri wa em khappood wa kiwi kiwi ki ri, kiwa yarap wow pynkrehkaam yaki Scheme sorkar haka jylla ka North East iwa da wanrah yaka roi ka paar. Da yaroh u leh yeiwa ye ka Assam Rifles wow krehkaam ha ki thaw wa em cha kdong cha chmiang kam ka thaaiñ Vijaynagar ha Arunachal Pradesh, ha Nagaland wa Manipur. Da klam u leh chaphang ki kaam wa da leh ki Assam Rifles Battalion wow e sikai ya ki khynroo khyllood yow e ha ki stat wow seiñ khih ki hapoh ka Skill India Mission, ki yalehke Sports deiwa pynman yaki Tournament wa ki Coaching Camp neibynta ki khynroo wa em ya i sap. Da yaroh u leh yeiwa ye ki wow pynsñiawthooh paidbah chaphang ka Swacchh Bharat, Jal Shakti Abhiyan waka Fit India Movement hapoh kani ka thaaiñ.
Da wai u leh yaka bytna wa thymme ka OPD Wing ka Assam Rifles Multi Speciality Hospital ha Laitkor.
Discussion about this post