I pynslem chna ya u sarok Jowai Bypass yoo lakam wa em kiwa ya chna poisa, ong ka High Court

Ka mukotduma PIL wa da yaleh da u Kynjaimon Amse heiyatoh wa u sarok NH6 deilang wa u sarok Jowai Bypass da chong bichaar biang ya ka ynnin ka sngi da ka Meghalaya High Court.

Hajrong ki bynta wa nadooh na Mihmyntdu hadooh Ratacherra wa pait da ka National Highways Authority of India (NHAI), da e jubab ki wa ki thaw wa sih toh ha ki thaaiñ Sonapur wa em chajan ka Tunnel iwa khlan bha u chah ktah hei oor khyndaw wei lang um ha ki por slap katwa kiwi won ki bynta da pynchna wei i pai thlu neidaw wa leh u slap da pyndap ki dei langær.

Heiyatoh won wa u sarok Jowai Bypass uwa na Thadlaskein cha Mihmyntdu, da ong toh uwa da sih hadooh kattæ kattæ heiwa ki kari ym ye de ki wow yait ya ki thlu wei ini da wanrah i leh yei sih kari neidaw wym em de pynchna ya uni u sarok wei ki kari wa boon da hap ki wow lai psiah na Jowai iwa da pynkhynnia ya ka chnong Jowai.

Ha i jubab ka chnat PWD (Roads), ka yung bichaar da ong ko da yoo lakam wa yaklam hi-eh heipor wa ya chong dih cha katwa yei psiang won ym em siang, heiwa uwa yaleh mukotduma da ong u wa tang i pyndap ya ki thlu da u mooria leh ym em leh katwa ka PWD won da pynyoo ko yei dur wa da em i pynchna wa da ye wow pyndep.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ka yung bichaar da pynkynmoo ko wa nachwa da e daw wym ye u kreh toh neidaw wa em u slap wei kattu ymtoh de u e daw neibhah ha uni u snem ym em joor u slap kam ha ki snem wa nachwa, kamtæ ymye de wow e daw wym ye u kreh neibhah kattu da sdang kut i por slap wei da yooluti wa waroh ki thlu toh u pyndap ki wei kiwi ki kreh pynchna leh toh u pyndep noh ki.

Ka High Court da ong ko leh da yoo lakam wa e daw hi-eh i pynslem u kreh yow chna poisa da ki kattu katni kiwa emkti wei ini ymtoh iwa miat la hei chna ya u sarok næ neibynta i bha i miat ki paidbah.

Kamtæ da phah ya u Secretary ka chnat PWD wow lai pait u dei khmat yow pyntikna wa waroh ki thlu toh kiwa da dep pyndap hapoh ar tayaaw yow lait ki kari wa heh u sih kamjooh yow lait ki u pyrchang wow psiah na chnong Jowai deiwa yait ya kani ka sarok Bypass.

Chooh chooh da phah leh ya ka chnat PWD (Roads) wow pyntikna ko wa waroh ki thlu wa em ha ki sarok yong ka jylla toh u man ki kiwa da pyndap kiwa da chah ktah ha u slap ha waroh ki sarok ka jylla wei khamtam ha sor Shillong.

Daw chong bichaar biang ya kani ka mukotduma ha ka 20-09-23.