Ka Meghalaya Assembly Committee on Women Empowerment da wan hiar ko cha East wa West Jaiñtia Hills District ka 21 wa 22 tarik uni u bnai yow booddien ya ki kaam pyrchah aiñ ya ki khynnah wa ki kynthai hapoh ki ar District wei kamjooh kammon da lai i bichaar ya ki mukotduma wa yatoh wa ini.
Ya kani ka Committee da yahkhmat da ka Santa Mary Shylla, MLA kam ka Chairperson heiwa da emlang kiwi ki MLA wa man kam ki dkhot wa kynthup ya ka Miani D Shira, u Adelbert Nongrum, u Gabriel Wahlang, u Marthon J. Sangma wa u Mathew B. Kurbah.
Hawa e yei klam hadien kini ki ar sngi, ka Chairperson da ong ko wa da wan yow tip yei chem chitom ki khynthai wa ki khynnah wow yoh yei hok yong ki deiwa ong wa emkaam wow pynsmat yei bichaar ya ki mukotduma khamtam ki POCSO Case.
Da ong ko leh wa da phah ya ki bor District wow e waroh i yarap cha kiwa chah thombor khamtam kiwa chah slaitbor neibhah da man kamwa chah pynchitom ki lada hap lai ma lai mih ki cha ka yung bichaar khamtam manda slem u pyndep ya ka bichaar.
Chooh chooh da ong ko wa da phah leh ya ki thaw sumaar wym toh u pynslem u wow e yarap cha kiwa chah thombor, kiwa chah slaitbor neibhah da pyntip wa em i por hap yang ki da ki kynta chwa wow em kiwon kiwon wa wan pait wan yoo ki.
Da kdaw ko leh wa ini i pynslem wow e yarap wei wow pyndep bichaar da ktah i chiboon khamtam ya ki khynnah wei i thong hi yong ka Committee toh wow pyndooh ya ini waroh wa da hap maad ki kynthai wei daw lai leh cha kiwi ki District hajrong ini i jooh i kaam.
Ki dkhot ka Committee da lai pait ki leh ya ka One Stop Centre wa em ha Khliehriat.
Discussion about this post