Ka Lockdown wa da pynbna ynne ka sngi neibynta ka East Khasi Hills District ka wow sdang nadooh i 8:00 waje i miet myntu ka 5 tarik hadooh 5:00 waje i step ka 10 tarik da pynkrehkaam hapoh ka Section 22 ka Disaster Management Act, 2005 heiwa cha kiwi ki District da pynman da ka Weekend Lockdown.
Hapoh East Khasi Hills da khang yei lai i wan ki kari wei u chah du kiwa kit ya ki mar wa emkaam wa kiwa lai yei kaam sumaar sukhær.
Da khang yei lai ki kari na wa cha ka East Khasi Hills District. Da khang leh yei wai waroh ki yaw wa heh ha East Khasi Hills District wa kynthup ya kiwa em ha Shillong, ya ki mar wa emkaam daw wai lyngba ki dukan wa em ha ki jar jiar ki dong.
Waroh ki yung krehkaam sorkar jylla wa sorkar pyrdi u man ki kiwa khang lait noh na kitu kiwa da yohbor wow wai.
Waroh ki Bank, Post Office wa ki yung krehkaam ki bru samen u man ki kiwa khang. Kamjooh leh ki Restaurant, Bar, Café, ki Takeaway Counters, ki Food Delivery Service u man ki kiwa khang.
Kiwa leh won ya ka Home Delivery Service ya ki mar wa emkaam chah hi wow leh ki yei kaam yong ki.
I kit ya ki mar rep hapoh East Khasi Hills daw pynbait da ka DC.
Chah hi wow pynman ya ki bia deiwa em du para chi yung wei ym toh u palat 20 ngut. I yalang ha iwa yap bru u chah du 20 ngut deiwa yoh bor na ka DC.
Neibynta kiwi ki District
Ka Weekend Lockdown u pynkrehkaam ha waroh kiwi ki 10 tylli ki District ka jylla iwa nadooh 10:00 waje i miet ka 7 tarik hadooh 5:00 waje i step ka 10 tarik uni u bnai.
Neibynta ka jylla waroh kawi
Da khang wow lai na kawi ka jylla cha kawi tangwa ym em khang ya ki kari wa lai luti cha Assam, Tripura, Manipur wa Mizoram.
Ki Exam ka MBOSE kiwa daw pynman haka 6 wa 7 tarik uni u bnai da rah cha 11 wa 12 tarik uni u bnai heiwa daw pynbna bniah won da ka chnat puræ puthi.
Kiwa lait na ka Lockdown
Ki wakreh Health wa kynthup ya kiwa e tika COVID-19.
Ki kaam wa ym hoi u dam kam ka Food Corporation of India, Electricity, Water Supply, Security, Municipal, Fire & Emergency Services, National Informatics Centre & Telecommunication Service.
I lai i wan ki mar wa emkaam, ki wareh ha ki laad pathai khubor, ki kaam rep ha ki thaaiñ palatsor wa ki kaam MGNREGA ha ki thaaiñ palatsor.
