Ka Synjuk Waheh Chnong Jowai chirup waka yung krehkaam ka District Tourism Officer, West Jaiñtia Hills District, daw pynman ki yaka lehkmen pdiang warom yei wan u snem thymme haka 1 tarik u Duiyatra (Jan) 2024.
Ha katai ka sngi nadooh 4:00 waje i janmiet u pdiang ya waroh ki Dorbar Chnong kiwa da ka’i u ya chimbynta dei wow wan ki ha thaw pynyieñ kari Stand Nangbah wa em ha Iawmusiang Jowai wow chim ki yaka Memento dep tæ uiñ liwan ki cha ki jar jiar ki chnong yong ki.
Kamtæ da khut ya phi ki lok ki jor najan najngai wow yawan sakhi phi ya katai ka lehkmen kam ka dak wa ya chimbynta.
Ya ki luti wow lai, da pynkhræh kamni:
Khimusniang, Mynthong, Chutwakhu, Tympang Iawmusiang, Mission Compound, Loomkyrwiang, Chiliangraij, Panaliar wa Tpep Pale wei u wan ki cha Stand Nangbah na Wah Nangbah, deiwa lai na Iongpiah-Tpep Pale ter ter.
Ki Lumpariat, Mookyrdup, Caroline, Ladthadlaboh, Moosalyngkat, Dongmihsngi, Salaroh waka Loomsooiung New Hill u wan ki naphrang Blue Heaven Restaurant cha katai ka thaw, deptæ uiñ biang ki.
Kamtæ da kyntu wow sñiawbha u ya bood ryntih kam katai ka luti khnang yoh u lait na i khynnia khynrah, yoh u suk ya i da-hi.
Ka Synjuk Waheh Chnong Jowai chirup waka District Tourism Officer, West Jaiñtia Hills District, e khublei ki ya phi ya waroh ki kaam wa dadep ha u snem warim, lym em phi kiwa ya krehlang, ym man ki kaam kiwa jop. Chooh chooh, e khublei leh ya phi ha u snem thymme wow wan deiwa yooluti wa u yoh ya i kyrkhu ha waroh ki liang khamtam ha i chait i nang.
Discussion about this post