Ka Seinraij Jowai heimon U Tre Kirot Kynrad dap ko dei mynsien Makhane yei bor iwa khroo yong oo, uwa yah wa chdooh ya i wa da ye u pyndep ya ka lehniam Behdieñkhlam 2024 deiwa lai bait lai ryntih, deiwa phooh wa phieñ deiwa chong bru chong Blai. I kyrkhu yong ki Blai ki Syiem i kyrkhu U Tre Kirot Kynrad da yoh i yei bneiñ i khyndaw kamwa ngooh wa dem wa da pyndep niam.
Ka Seiñraij Jowai ymye ko khlem da pynsñiaw ya i mynsien makhane ya waroh kiwa da embynta wow pynman ya ka Behdieñkhlam yong i kawa jop.
Nyngkong nangchap ya ka Dorbar Niam ka Raij Jowai hei yahkhmat u Dolloi, ka Langdoh, U Langdoh, U Pator, Ki Sangot, Ki Maji, ki Wasan ki Waheh kiwa da pyndep ya ki kaam niam nadooh u Wisu (March) hadooh ki Soo Sngi Ki Le Yaaw.
Ya ki Phra Kur Phra Kmai, Ki Le Langdoh ki Le Langpung – U Kongwasan Chyrmang, U Langdoh Tuber wa U Langdoh Ialong.
Pynsñiaw i yei sñiawngooh haroh ya u Deputy Commissioner, West Jaiñtia Hills District uwa da yarap ya i kam u khlieh ka District ha kiwa boon ki bynta, ya u Superintendent of Police, West Jaiñtia Hills District uwa da pynbiang pyntoh neibynta i lai i wan ki kari wei wa da pynbiang haroh ya ki pulit neibynta wow lai ryntih i krehkaam ka aiñ.
E khublei kyrpang ya ka MeCEL wa ki Cable & Internet Service Provider kiwa da yaleh wow pynbiang pyntoh neibynta wow lait u em i wit i thut yong i lai ki Rong (Rot) ha ka Sngi Muchai. E khublei kyrpang i ya ka Doordarshan Kendra, Shillong wa ya ki Electronic wa Print Media nadooh kiwa na i na Jowai, na sor Shillong wa kiwi kiwi kiwa wan na jngai wow pynpoor yei burom i naam ka Behdieñkhlam yong i.
Ka Seiñraij Jowai dap ko dei sñiaw makhane ya waroh kiwa da wan wow sakhi ya ka Behdieñkhlam 2024 nadooh ka sngi Pynsiñ hadooh ka Muchai. Kyrpang ya u Montri Rangbah wa emburom yong i, u Conrad K Sangma uwa man kam u kongsan. I em i yong oo nang pynphooh pynphieñ chooh chooh ko ya sngi khaddooh yong ka Behdieñkhlam yong i.
Dap i dei mynsien sñiawngooh iwa khroo tam ya u Montri Rangbah yong i uwa kular wow pynchna ya ka Parking Lot ha Madan Siat Thong neibynta i suk i saiñ yong waroh lang ki khon ka chnong Jowai, kamjooh leh u man kam chibynta i pynmiat i pynphooh pynphieñ ya ka sor Jowai yong i.
I e khublei ya u Wailadmiki Shylla, MLA yong i uwa da yarap ya ka Seiñraij Jowai ha kiwa boon ki bynta yong ka Behdieñkhlam wa ya kiwi tawon ki bynta kiwa ka Seiñraij Jowai ye ko u chakri ya ka imlang sahlang.
E khublei ya waroh ki Montri ka Meghalaya, ki MLA, u Chief Executive Officer wa ki MDC ka JHADC, ki sahep sorkar Meghalaya, ka North Eastern Council (NEC) ka sorkar India waka chnat Arts & Culture ka sorkar Meghalaya.
E khublei leh ya ka Seiñraij Shillong, Seiñraij Niamtre Ummulong, Seiñ Tyllilang Niamtre Ladthadlaboh, Niamtre Iawmusiang, ki chnong ki dong, ki Syiem, ki Dolloi, ki Langdoh, kiwa krehkaam Niam yong ki Raij waphær waphær, ki President wa ki Secretary yong ki Seiñraij, Seng Khasi waka Sengkhihlang kyrpang wa ki paaid ki phlang najan najngai kiwa da emlang wow sakhi ya ka Chaad Niam Behdieñkhlam 2024 yong i.
Ka Seiñraij Jowai ym ye ko leh khlem da e khublei kyrpang ya ka Ministry of Development of North Eastern Region (DONER) ka sorkar India, ka chnat Tourism ka Meghalaya waka Arts & Culture, Meghalaya kiwa da yarap wow pynman ya ka Behdieñkhlam yong i kawa jop da i bor wa i kor.
Discussion about this post