Ka Seinraij Jowai lyngba u President, u O.R. Challam wa u General Secretary, u Arwotki Sumer da pynsñiaw ko i sñiawngooh wei e khublei ya u Lat ka jylla Meghalaya, u Phagu Chauhan, ya u Chief Justice ka Meghalaya High Court, u Sanjib Banerjee, ya u Montri sorkar u Kyrmen Shylla, ya u MLA ka North Shillong, u Adelbert Nongrum, ya u Deputy Chief Executive Member ka Jaiñtia Hills Autonomous District Council u Lasky Rymbai hajrong i pynlait por yong ki u wan sakhi yaka Behdieñkhlam 2023 ka Seiñraij Jowai.
Ka Seiñraij Jowai sñiawngooh ko leh yaka Ministry of DONER ka sorkar bei, ka NEC, ka chnat Arts & Culture wa Tourism ka sorkar jylla, yaki bor District, West Jaiñtia Hills District, yaka Planning Department hajrong i kyrchaan yong ki wow pynman yaka Behdieñkhlam kawa phooh wa phieñ wei kawa jop.
Neitæ leh da sñiawngooh ya ka yung krehkaam u Superintendent of Police, yaka Public Health Engineer Department, ka MePDCL, ka Jowai Municipal Board, ka Public Works Department wa ya waroh ki chnat krehkaam kiwa da yarap wei e kyrchaan.
I sñiawngooh lai ko leh cha waroh ki Dorbar Chnong, cha ki khlieh wa pait yaki riti dustur wa kynthup nadooh ki Dolloi, Wasan yong ki Elaka waphær waphær, cha ka Seng Khasi Kmie kamjooh ki chnat waphær ka Seng Khasi, cha kiwa uiñke suwari ka ri wa kiwa na baar ri, cha ki paidbah wa paitke kiwa wan naki rukom im waphær waphær.
Neitæ da sñiawngooh haroh ya ki khubor e khublei Behdeiñklam kiwa da wan naki chnat krehkaam waphær, na kiwa chah khut sñiawbha kiwa wan neiliang ka sorkar kamjooh kiwa em hei jait ngait waphær waphær.
I sñiawngooh leh lai ko cha ka yung krehkaam u Lat, ka Ministry of Doner, u Chief Minister ka Meghalaya, u Chief Secretary ka Meghalaya. Cha waroh ki jait ñiam wa kynthup ya ka My Home India, Delhi, ka All Faith Forum, u Arch Bishop ka Balang Catholic Jowai, ka Jowai Unitarian Church, kamjooh ya waroh kiwa da e i kyrkhu kyrdoh heiyatoh waka Behdieñklam lyngba ka rynsan Social Media.
I sngawngooh leh ya kiwa pathai khubor kiwa da dohyap u pynpoor khubor, wei khaddooh ya waroh ki bru ka jylla waka ri hajrong i ye u pyndep yaka Behdieñkhlam kawa man ka State Festival haka 9 tarik uni u bnai ha Syiem Aitnar.
“E wa kani ka lehniam u pynyatylli ko ya i waroh yow wanrah yei suk i saaiñ”, pynkut ka kyrwoh.
