Hadien ka yakhih syndet hakhmat ka khyrdop Secretariat, Ka Sur Ki Nong Mawlai hapoh i yahkhmat ka KSU, FKJGP wa HNYF da kynthah eh ki ya i mutlop ka sorkar wa kdaw che wa ka emkti ko ha i chah siat yap u Cherish Starfield Thangkhiew.
Uwa yahkhmat ka kynhun uwa man leh u President ka KSU Mawlai Circle, u Rapborlang Nongrum da ong u wa ka sorkar ym em ap ko yei dawa yong ki paidbah khamtam na i sur ki nong Mawlai, wei da ong u wa i yong sakhiat toh wa ka sorkar u sñiawthooh ko wa nadooh ka 15 tarik Naisaphra kawa toh ka sngi lai tlep ya u Thangkhiew, heiwa ki paidbah na kylleiñ da tooid ki wow pynsñiaw yei sñiawlem neibhah ki sñiawkhia ki ya iyi wa da jia.
Da ong u wa i wym bna ka sorkar wow beh kaam ya ki heh pulit da pyntharai sih wa em iyi iyi cha lyndet wa ka sorkar ka tip ko, iwa da wanrah yei suba sih neiliang ki paidbah. Da ong u wa i klam yong u Montri Kaam Pohyung, u Lahkmen Rymbui wa ym em tip iyi iyi ya itai i jia leh da booh ha i artatien neibhah wa lada u Home Minister ym tip, kiyi won wow tip.
Da ong u wa lada ka sorkar ym em ko yei kitkhlieh wow sñiawkhia ya itai i jia wow lai pynyap ya u Thangkhiew, da pynyoo wa emkti lang ha itai i jia.
Ha i jooh i por u Rapborlang da ong u wa ha ki kajiak sngi wa da dep, ka kynhun da dep ko wow pynman ya ki yakhih waphær waphær, wei lada ka sorkar u dang pteiñ ko yei suki hajrong i dawa yong ka Sur Ki Nong Mawlai, ka kynhun daw chong wow chim chooh chooh i rai wow pynjoor ya ka yakhih, neibhah wa ka yakhih toh neibynta i chngaaiñ ka jaitbru mynstep man kawi.
