Iwi na ki thaw lai uiñke suwari wa dang thymme wa em ha chnong Mustem, West Jaiñtia Hills iwa jngai du hapoh 15 Km na Jowai iwa em leh hadooh 7 tylli ki kchaaid nadooh kiwa heh hadooh kiwa khian, man i iwa yoosuk, iwa khooid, iwa pynngaad wei iwa suk wow poi.
Ini i thaw leh toh iwa tip kam ka Mustem Le Wah Eco Tourism.
Cha ini i thaw ye phi wow poi da ka kari deiwa lai lyngba ka sarok Jowai-Dawki (NH-44E) deiwa khlaad cha ka laad wow lai cha Mustem, deiwa bood ya kani ka sarok hadooh wa poi i laad wa kdaw yow lai cha kchaaid Sajri iwa man leh i jooh i thaw wa em kini ki kchaaid.
Hadien wa kut u sarok psiang, yow poi chadooh ki kchaaid man u da u sarok khyndaw wei lada wan phi da ki kari khian, bha wow hiar dei kjat na chrooh u loom dei wym bood ya u sarok heiwa da chna leh da ki yingkieñ yow kaap ha ki thaw wa em um.
I lai kjat ym toh iwa jngai wei pyn na khlieh hajan u sarok khyndaw da em kawai ka kchaaid tangwa ha kini ki por man ko kawa stang. Ka kchaaid wa nyngkong hadien kani toh ka kchaaid Umpathoo kawa ye phi wow lai hadooh harood yong ka kawa ym em da heh ware tangwa kawa miat.
Ha wah kani ka kchaaid da em sa artylli ki kchaaid wa khian kiwa ye phi wow hiar hadooh ha ki.
Kawa heh na kini ki kchaaid wa da yoh u yoo toh ka Sajri kawa da dep wow chna ki rana wow hiar cha ka wei man ko ka kchaaid wa miat dur wei kawa kynjai, kawa ym em ood kam kiwi ki kchaaid heiwa ym emkaam u ya kbai hawa yaklam hanla em phi pyn hajan yong ka leh hawa nujor yei heh ko.
Kiwa boon kiwa wan cha kani ka thaw toh yow lai ki cha kani ka Kchaaid Sajri kawa da em leh ki thaw wa da booh yow chong ngiah.
Lada thooh thaw phi da iwa thymme, iwa dang duna bru wa lai ke, iwa suk wow poi wei lada kwah phi wow yoo ym du kawi donhi ka kchaaid, ini toh i thaw ya phi.
Ki kchaaid wa em ha ini i thaw toh ka Umpathoo, Monhadem, Phephe Lumkutor, Umbluh, Sajri waka Dait Khla kiwa da yoh pyrtuid.
Hanla da lai i cha ini ki thaw ha ini i por tlang leh, man ki ki kchaaid wa em um hi ym toh kiwa sngad.
