Ka KHNAM Youth Wing da ong ko wa i thung kam ka Chairperson daka bru wakreh sorkar man ko pyrchah yaka aiñ.
Ka Meena Kharkongor kawa da kut i por wow man ko kam ka Chairperson ka State Commission for the Protection of Child Rights haka 28th February 2020. Heiwa heithaw yong ka, ka sorkar jylla da thung ko da ka IAS wa ksoh boon tylli ki kaam wow man ka Chairperson.
Ka KHNAM da ong ko wa ka aiñ Commission for Protection of Child Rights Act 2005 da ong che ko wa ka Chairperson toh u man ki ki bru kiwa da leh yaki kaam wa bha wa khroo yow yada kamjooh wow pynyoh yei hok ki khynnah.
I thung yaka Chairperson toh deiwa tyrwa ki 3 ngut ki dkhot ka Selection Committee hapoh i pait Chairmanship u montri wa pait ya kani ka kaam.
Ya kiwa thung kam ki Chairperson ym toh kiwa su yaki palat ya i kaam wa da leh ki wei kini waroh pynyoo ko wa ini i thung daka IAS man ko pyrchah yaka aiñ.
Ka KHNAM da ong ko wa i thung da ka IAS yei kaam Chairperson daw pynboon yukit ko yaki neibhah kam ka Chairperson da hap ki wow lai mih hakhmat ki yung bichaar, u lai cha ki Juvenile Home, u booddien yaki mukotduma wa boon. Ka KHNAM da ong ko leh wa da em chwa da ki hjar tylli ki mukotduma wa sahkut hapoh ka aiñ POCSO Act kiwa emkaam wow pyndep smat.
Kamtæ ka KHNAM da ong ko wa ka sorkar toh u pynyisur ko yei por ka Chairperson warim lada ym yoh bru ko wa kiwa biang heithaw wow thung da ki bru sorkar.
Da pynkut deiwa ong wa ha kini ki por ka khlam, ki khynnah toh kiwa emkaam dooh wow yoh yei sumaar, yei yada kamtæ da dawa joor naka sorkar wow thung da ki bru wa biang ha kani ka kaam lane wow thung chwa daka Chairperson warim chipor.
Ka kyrwoh na u Thomas Passah, President KHNAM State Youth Wing.
