U Deputy Commissioner ka West Jaiñtia Hills District u Garod LSN Dykes ynne ka sngi da ong u wa i poor u khñiang khlam hapoh ka District toh neidaw wa ki bru rap boon tieñ ki neibhah wa hanla em ki ya ki dak ki chin wa chah ktah ki ha u COVID-19 dang artatien ki wow leh Test ya boi man Positive ka Report ki.
Da ong u wa ini i tieñ ki bru wow wan chaphrang wow leh Test da pynbood i yei ku syndet kiwa chah ktah wei ymye de ki wow yoh yei sumaar iwa paka heipor wa biang.
Chooh chooh da ong u wa hapoh ka District da pynkrehkaam ya ka Total Curfew hadooh i step ka 1 Naiynru tangwa dang pteiñ hi i poor kani ka khlam heiwa kiwa chah ktah da kynjoh i cha ka 23% namo ka Positivity Rate iwa mut ki bru wa yoh ya u khñiang na kiwa chah Test.
Da pynrap u leh deiwa ong wa hadooh ynnin ka 24 tarik kiwa chahktah da em ki 588 ngut katwa ki dang chait won du 83 ngut, wei wa kani ka khlam da poor ko ha waroh kawi ka District nadooh na Jowai, ha Laskeiñ Block heiwa kiwa chah ktah rap boon da em ki ha Mynska wa Mowtyrchiah, ha Thadlaskeiñ Block won ha Nartiang, Ummulong, Moodymmai wa Wahiajer.
Hajrong ini waroh, neiliang u DC da kyntu u ya ki paidbah wow bood ya ki laad yada wa da booh da ka chnat i chait i khiah.
Chooh chooh da ong u wa lada em i sñiaw chitom toh wow lai Test wut-wut neibhah i daw wa poor smat kani ka khlam toh wa slem ki paidbah wow lai leh Test wei da leh ki yeini (Test) du manda lat ware i por.
Heijooh i por da ong u wa ki bru kiwa ym em ki dak chitom toh u sñiawthooh ki wei wow pdiang leh wa uni u khñiang da em u ha ka imlang sahlang wei da emkaam wow bood ya ki kyndon ka sorkar khamtam wow sap ya ki mask, wow kiar yei yalang paidbah wa kiwi kiwi.
Heiyatoh wa i pteñ ka Total Curfew wot hadien ka 1 Naiynru, da ong u wa yeini daw chong bichaar yei man i long wei hadien ka 30 tarik lada dawa i kaam ye wow pteiñ biang ya ka neibhha kani ka khlam dang poor ko wei lada jia wa wai leh daw emkaam hi ya ki kyndon wow krehkaam ki.
