Ka Jaiñtia Hills Autonomous District Council (JHADC) man ko ka stieh wa da tipmit da ka riti synchaar ka ri katkam ka Sixth Schedule wow yada ya ka jaitbru kawa waroh i kyruiñ ki cha ka heiyatoh wow chna ya ki aiñ wow yada yei man kyrpang ka jaitbru yong i.
Boonsien ki paidbah wa ki seiñbhalang dawa ki wow chna ya ki aiñ wa har rukom wei kawi na kitæ wa dang sahteiñ hadooh katni toh wow chna ya ka Customary Law namo ka aiñ heiyatoh wa i rukom im wa kyrpang yong ka jaitbru.
Ynne ka sngi ha ka yalang lehkmen dap 50 snem ka JSU, neiliang u Executive Member ka JHADC u Phasmon Dkhar hawa e yei klam da ong u wa sñiawsuk u wow embynta ha kani ka sngi neibhah wa man ko ka sngi wow sahkynmoo ya ka seiñ heiwa da jooh embynta u wa ka seiñ kam uwa e buit yong ka.
Da ong u wa i dap 50 snem man i i jop ym du yong ka seiñ tangwa ka Ri-loom Jaiñtia hi waroh kawi.
Da ong u wa sñiawsuk u ap yeiwa klam kiwi heiyatoh wa kiwa boon ki kaam khamtam wa ka Customary Law waka Border Outpost.
Heiyatoh wa ka Customary Law, u Phasmon da ong u wa ki paidbah ong ki wa tlot tangwa ka JHADC hapoh ka Executive Committee wa katni dei langær jooh khut ko ya ki Dolloi wow e ki dei thoh ya i rukom im namo ka Customary Practices hapoh ki Elaka yong ki khnang wow ye ka JHADC u chna, u wanrah ya kani ka aiñ.
Da ong u nei slem ki u e hajrong wa da pynkynmoo ya ki, em ki por jooh chrai u ya ki Dolloi neibhah emkaam wow chna ya ka Customary Law wei kat wympu e ki Dolloi ya kitæ ki kot heiyatoh wa ka Customary Practice yong ki Elaka yong ki, ka Executive Committee ym ye ko wow leh iwon iwon.
“I tlot yong ki Dolloi wow e ya ka Customary Practices yong ki tæ ymye u chna ya ka Customary Law,” da ong u Phasmon deiwa kyntu leh ya ka JSU wow pynkhyrngiat wow kyrsu thiah ya ki Dolloi ha jar jiar ki Elaka wow pynkhreh smat noh ya ki kot ki sla wa emkaam wow pynpoi noh cha Council.
Heiyatoh won wa ka Border Outpost da yoosuk u yei yatylli ki seiñbhalang khamtam ka JSU hapoh i yahkhmat u President yong ka, u Jersom Shylla neibhah wa da sñiawkhia ka seiñ yeiwa jia ha Mukroh.
Chooh chooh da ong u wa ha ki sngi wa dadep da hiar ki MDC ka JHADC cha i thaw wa jia chirup wa ki sahep ka Council.
“Da kular i ya ki paidbah wa la man katwa man ym randien ki MDC, i u emlang bait i wa phi wei ym chah i ya ki Karbi wow tooh ya ki thaw ki bhaw yong i wei da poi hadooh u pood wow yakhun thma i wa ki,” da ong u Phasmon.
Heijooh i por da ong u wa la 50 tylli ki snem wa da lai da boon ki Montri Rangbah wa da lai tangwa u Montri Rangbah wa katni, u Conrad Sangma da lai u waroh kini ki thaw kajia iwa pynyoo wa nood u tba ya i kaam pood ka jylla wei ya ini waroh wa sakhi ki.
Da ong u leh i ym dem ym ngooh i haphrang ki Karbi wei u yieñ bait katkam ka Zero Point namo u pood wa sakhiat katkam i pait i yoo ka JHADC.
