Iwi i Video wa da poor bha wa pynyoo ya kawi ka khynnah khian kawa chah sumaar yei kha wa em ha ngaap ko iwa da heh bha i thlu wei da em boon ki kseiñ hapoh.
Da pyntikna wa ini toh iwa ha Mawkyrwat Civil Hospital wa chah sumaar kani ka khynnah kawa em 5 snem i rta heiwa da em leh wa riñ Video yeiwa sai ya ki kseiñ na ini i kha wa em ha i ngaap ko neliang timun.
Ini i kha toh iwa da neh da rap slem wei da joor i chah baam ha kini ki kseiñ neidaw wym em wan lai e sumaar la le bnai deiwa pyrchang hi ka bei u pa kani ka khynnah wow sumaar yeini i kha.
Mar ya poi kani ka khynnah ha Hospital, ki Doctor da rai ki wow sumaar ka wut wut deiwa pynkhooid ya ini i kha ha ka 2 tarik uni u bnai deiwa sai leh ya ki kseiñ wei ha ka sngi wa bood won da phah ya ka cha Ganesh Das Hospital wa em ha Shillong.
Heiyatoh won wa ini i Video wa da poor, neiliang ki bor pynlai Hospital da pyntip ki wa da riñ yow man ko kam wow e sikai ya kiwi tangwa da em wa pynpoor ki wei da man i leh pyrchah yei hok man samen kawa chah sumaar wei da paan maap leh na ka yung ka sem kani ka khynnah.
Neiliang ki Doctor da kyntu ki leh ya ki paidbah wa lada em iwon iwon wow smat u wan cha ki thaw sumaar wei ymtoh wow pyrchang hi wow e dawai yow lait u jia iwon iwon iwa maa.
Kani ka khynnah wa jia ini toh kawa na South West Khasi Hills District.
Discussion about this post