Ki bor pynlai chnong ka Lapangap wa kynthup ya u Waheh Chnong, u Deimonmi Lyngdoh ynne da lai yachem ki wa u DC ka West Jaiñtia Hills District heiwa da emlang leh u SP ka District yow dawa booh Police Batallion ha loom Moopyrdet Pynthor Lapangap.
Da pyntip cha ki bor ka District wa ha ka 12 tarik u Naiynñiaw heipor 12:00 waje chiteiñ sngi wa ha ka 18 tarik uni u Naisaphra heipor 1:00 waje i sngi, ki pulit ka Assam wa ki Karbi da wan ki wow lehbor wei lehpynsih deiwa phut kynjroi ya kamwa 5000 tylli ki tre dieñ wa da thung da ka chnong Lapangap ha u loom ka chnong wa tip pyrtuid kam u loom Moopyrdet Pynthor Lapangap wa dang haap hapoh ka Elaka Shilliang Myntang wei ya kini ki dieñ da yoh naka sorkar lyngba ka Meghalaya Basin Development Authority deilang naka yung krehkaam u DC.
Chooh chooh da pyntip leh wa ha ka 26 tarik uni u bnai heipor 2:00 waje i sngi, ka sorkar Assam da booh syndon ko da ka Police Battalion Camp ha i thaw kani ka chnong wei ini leh yabor da wanrah ko yei maa wei chong syier kiwa chong chnong khamtam kitu kiwa lai rep ha kani ka thaw neibhah deiwa em ki pulit ka Assam, ki Karbi da yoh laad chooh chooh ki wow lehpynsih ya ki tre dieñ wa da thung da ka chnong wei wow kam leh ya ka thaw rep wa ki hali pynthor ka chnong.
Na kini ki daw, ka Dorbar Chnong Lapangap da kyrpaad ko wow booh da ka Police Battalion ha kani ka thaw wa ya kajia khnang wow yada na iwon iwon i jia wa sñiawsih wei yow em ka chongsuk wei chngaaiñ ha ka chnong ka thaw.
Da kyrpaad leh wow yaklam wa ka sorkar Assam wow kyrriah noh chisyndon ya katai ka Police Battalion Camp ka Assam yow lait nei chah pyndik kiwa lai rep, heijooh i por leh da kyrpaad wow phah lai uiñ sonteri ya ki pulit ka Meghalaya nadooh i step hadooh i miet.
Neiliang ki bor District da kular ki wow chimkhia yeini.
Discussion about this post