Jowai: Haka lyngkhooh dap snem wa 133 i wan ka Balang Unitarian, u Rev. H.H. Mohrmen hawa e yei klam ynne ka sngi haka Balang Unitarian Jowai da ong u wa hanla ha kam kini ki por da khang yaki yungmane neibynta u yada yaka khlam COVID-19, tangwa i kyntang yong ka yungmane won ym em dooh i neibhah i kyntang wym toh nei dur wa yoosuk yong ka, ym toh naki bru wa wan yaseiñ lang haka, tangwa toh na i dak waka yurim wa chynna chajrong wei kamjooh leh ki kaam kiwa bha wa da sai naka yungmane kiwa kynja mynsien.
Ong haroh u wa waroh kiwa em haka pyrthai toh kiwa kynja Blai wei wa kyntang, ka pyrthai toh ka thaw sah u bru wa waroh ki jait wa em ha ka.
“Toh hi mo du u bru uwa man kordor hakhmat u Blai, i khut yong kani ka yaseiñ toh u kyruiñdien cha ki por wa man chi sur chi dur u khon bru, toh u sñiawthooh wa ym toh du u bru u jait wa da chna u Blai tangwa waroh hi ki jait nadooh iwa khian hadooh iwa heh leh man ki i jooh, i sñiawthooh wa u bru toh u kynrad hajrong waroh, wei i sñiaw stat sñiaw khroo u bru booh ko hei eh yaka pyrthai kamwa man katni,” ong u Rev H.H. Mohrmen.
Hei sakhiat i im yong i ha sla pyrthai da kdoh da songlang wei hap u ya kyrchaan iwi yeiwi, wei ka mynried yong ka pyrthai leh chong ko wa kammon ki bru tip ki wow burom yaka. Kamtæ i khut wa sakhiat toh wow yoo i yei man iwi don yong waroh haka pyrthai.
Heijooh i por ong u wa i wan kani ka khlam haka ri waka pyrthai hi waroh wanrah ko yei kylla wym du hei bor pyrkhat tangwa hei rukom im u bru kamjooh, wei i jia kiwa kam kini pynman ko ya u khon bru wow thooh yumut wow toor wei sdang yei rukom pyrkhat wa i rukom im wa thymme.
Ha kani ka sngi chwa u sdang yaka yaseiñ deiwa bood ryntih yaki kyndon sorkar, da pynhær yaka lama yong ka niam ha pchem ka yungmane wei da pyndeiñ syntu leh ya u mot yong uwa seiñ yaka Balang Unitarian u Babu Hajom Kissor Singh Nongbri.
Chooh chooh neiliang ka Balang Unitarian da chim haroh ko i bynta u pynkup burom ya kiwa yakhun pyrchah wa hakhmat dooh ka khlam COVID-19 wa kynthup yaki waheh chong deiwa ekti ha u President ka Synjuk Waheh Shnong Jowai u A. Ñiangti, ya u waheh chnong ka Tympang Iawmusiang u E. Shylla nalor ki Doctor waki Nurse kiwa toh ki khon ka Balang.
