Uwa yaleh RTI wa paaw, u Disparasing Rani da ong u wa i wan yong ka Roster daw man ko ka laad yohkaam neibynta ki khynroo khyllood kiwa em ka sap yalehke, neibhah katkam ka RTI na ka Sports Department da chem wa nadooh u snem 2010 hadooh 2017 ym em hi wot ki khynroo khyllood wa yalehke wa yoh ya ka bhah wa 2% ha ka yoh kaam yoh jaam.
Da ong wa ini i wym yoh yei bhah da pyndooh mynsien noh ya ki khynroo khyllood wa em sap yalehke neibhah wym tipmit ya ki.
U Rani ha iwi i liang da pynsñiaw u wa da em ka ujor wa ki wakreh thymme ha Secretariat wym yoo tipsap tiptap wei da pynsñiaw u wa ye u man wa i wan kani ka Roster ye u man ka laad thung kaam Contract wa Officiate.
Da ong u wa hajrong ini i ujor na ki kattu katni tylli, da paan ya ka RTI hajrong 119 tylli ki kaam ya toh em i leh arsap wow thung kaam.
Heijooh i por u Rani da khana u wa hei thooh yutip yong oo da em ki kaam kiwa da lait biang sa kamwa 290 tylli ha ki chnat krehkaam waphær waphær yong ka sorkar wei da khana wa hadooh katni da em 3367 tylli ki kaam kiwa lait. Da khana u wa neibynta 3077 tylli ki kaam wa da dep wow lait rap nachwa da e kti cha ka seiñ KSU yow chimkhia lang.
