U montri rangbah ka jylla, u Conrad Sangma ynne da ong u wa i khlaad ki manbei namo ka Maternal Mortality Rate (MMR) wa i khlaad ki khonboo namo ka Infant Mortality Rate (IMR) hapoh ka jylla chong i ha i yoh i la wa i chait i khiah deiwa kdaw wa i daw yong ka MMR toh neidaw wa 10% toh i pun-khon dang khynnah (Teen Pregnancy), 30% toh kiwa da kha khon palat 3 sien hapoh 30 snem kamwa 40% toh i pun-khon khlem poipyrkhat.
Hajrong ini waroh, neiliang u Conrad da ong u wa ka sorkar da yaleh ko wow pynduna yeini neibynta i bha i miat deiwa kdaw leh wa da em ki kynthai wa 19 snem da em ki 3 ngut ki khon khlem pynjngai yei por wow kha.
U Conrad Sangma, da jubab u yeini waroh hajrong ka phang wa wanrah u MLA ka Congress, u Himalaya Shangpliang ha ka dorbar ynne ka sngi heiwa u Conrad da pynsñiaw u yei mynsien wa sñiawkhia hajrong ini waroh deiwa pynrap wa ini man i iwa sñiawsih neibhah wa jia i khlaad ki manbei dei langær.
Chooh chooh u Conrad da pyntip u wa i khlaad ki manbei heipor wa kha ha u snem 2015 em ki 211 ngut, ha u 2016 won 198 ngut, 197 ngut ha u 2017 wei 164 ngut ha u 2018, wei ha u snem 2019 da em ki 174 ngut katwa ha uni u snem da chem wa em 61 ngut wa doh yei mynsien yong ki.
Hajrong i khlaad ki khonboo kiwa hapyrdi 0-12 bnai, da pyntip u wa ha u 2015 da em 2530 ngut, 2427 ngut ha u 2016, 2512 ngut ha u 2017, 2074 ha u 2018, 2574 ha u 2019 wei 889 hadooh kattæ uni u snem.
U Conrad da pyntip u leh wa ka poisa wa T. 350 klur daw yoh na ka World Bank heiyatoh wow pynku ya ki thaw sumaar kam ka Primary Health Center, Community Health Center wa Sub-Center, wei ya kani ka poisa daw pynlut leh ha ki stat ki kor ka juk iwa katni kam ka Information Technology neibynta ka Tele-Medicines.
Da khana u leh ya ka Meghalaya’s Outcome Oriented Transformation in Health, Nutrition, Education and Rural Development (MOTHER) programme deiwa ong wa deiwa pynemkaam ya ki bor ki stat ka juk katni, neiliang ka sorkar daw yarap ko ya ki kynthai wa pun-khon, wa kiwi kiwi ha kylleiñ ka jylla.
Heijooh i por da ong u wa da pyrchang wow yakhun yeini wa kiwi ki kaam (lait na i yakhun COVID) emkaaam wow kyruiñ cha kiwi ki bynta heiwa ki bru dooh ki yei mynsien yong ki.
Hapyrdi i yañia neiliang u Shangpliang da ong u wa ki kynthai wa pun-khon wa ki khynnah ymyoh ki ya ki dawai, wei em i duna wow kha khon ha ki thaw sumaar wei em leh i duna i sumaar ya ki manbei wa dang kha kamjooh leh ki khonboo yong ki.
Neiliang u MLA ka Mawsynram da kyntu u leh wa hapyrdi ka khlam u COVID-19 ka sorkar toh u pynjoor ko ya i e dawai, nadooh heipor wa pun-khon hadooh hadien wa kha deiwa kyrmen wa i khlaad ki manbei wa ki khonboo daw duna bha i.
Da kyntu u leh ya ka sorkar wow chimkhia ko yei smat chongkha ki khynnah neibynta i mynried yong ki.
