Jowai: Ka All Biate Students Association Jowai Unit, ynnin ka sngi 11 tarik da pynman ko ya ka yachem wa chisien chisnem, kawa da tip kam ka “15th Annual Social Meet 2015”, ha District Library Auditorium Jowai.
Ka phang yong kani ka yachem ha uni u snem man ko “Thiamna hih Zalenna Ritha anit” iwa mut i stat man i iwa kongsan yei imsuk imsaiñ.
Ha kani ka sngi da emlang u MDC ka Saipung Block u ma Arbor Hima Darnei uwa pait ya ka Taxation Town Committee ka JHADC uwa man leh kam u kongsan ha kani ka sngi. U ma Dinga Ngaite Vice President, Biate Devanpun General Secretary kam u symbood kongsan, da emlang leh u ma President JSU, u ma Rikut Parein, u Zosiama Thiangla Secretary Biate Devanpui Meghalaya, u Rev D.C Thuama B.P.C Synod, u David Ngaite A.B.S.A General body ki President wa Secretary ka Shillong wa Khliehriat Unit, ki manbei manpa, ki khon khynroo khyllood wa chong wa sah ha Jowai wa kiwi.
Kam chibynta wow pyn wyrngia ya kani ka yachemlang da pynman leh ya ki prokram wapher wapher deiwa yachim bynta ki kynroo Biate haki rwai, chad wa kiwi.
Da em leh ha kani ka sngi ka yakop Miss & Mr All Biate Students Association Jowai Unit, kawa da yachimbynta 11 ngut, 6 ngut ki kynthai 5 ngut ki chynrang.
Ha kani ka yakop da jop na pyrdi kini ki 11 ngut ya ka naam Miss ABSA da rah daka Rovi Nangpui katwa yei naam Mr. ABSA da rah da u Dickson Darnei.
Discussion about this post