Da: U Chandame Sungoh
Du hapoh iwa khreh u thoh chaphang ka Good Friday waka Easter Sunday poi cheiwa lait ki por ki tarik, neidaw wa boonkaam. Heini i por won sñiaw emkaam u ya saam lang ya kani ka yutip heiyatoh, “I yajan hapyrdi ka Easter Sunday waka Chaad Sukra”. Na ki yutip kiwa yoh O u pynlum pynlang na ki liang waphær waphær na ki kot wa na Internet. Hawa thoh ya kani ka yuthoh ym em u mut O u wanrah yei sñiaw pyrchah niam hapyrdi ki lok kiwa dang man Niamtre wa kiwa da man Christan. Thoh O deiwa em yurim khnang wow e yei tip ya ki para doh para snaam kiwa dang rap duna i tip i sñiawthooh.
Ka Easter Sunday toh ka sngi kyrpang ki Christan katwa ka Chaad Sukra won toh ka chaad tynre kawa jooh leh da ki lok kiwa man Niamtre, kat da kamtæ ye phi u ong wa kammon yajan ki næ? Heiyatoh wa ini to yn ya puræ i yeini i sakhiat yow tip rap bha i.
Kamwa da ya tiplang i waroh, kiwa boon hi ki jait niam mih ki napoh ka dawbah Asia kam ka niam Hindu, Buddhism, Jain, Sikh, Judaism, Christian, Muslim waki wi kiwi. Kamtæ lada thooh bha i yei tre yong kitæ ye i u chem wa em iwa yajan næ yatoh. Kamtæ ka Easter Sunday waka Chaad Sukra leh em ki i yajan.
To yn ya puræ i kajiak chaphang ka Easter Sunday katkam i ngait ki Christan. Ka Easter Sunday toh ka Sngi U Blai wa kyrpang yong kiwa bood ya u Jisu Christ kiwa da tip kam ki Christan. Ki Christan ha chityllup ka pyrthai da kynmoo pynemwarom ki ya ka sngi wa khai im biang u Jisu Christ napoh loom yutep ha ka sngi wa le hadien wa da tlep ya oo neidaw wa chah tynyap u deiwa sah narphna ha Loom Kalbari. Ki Christan da ngait ki wa u Jisu Christ toh u Blai wa im wa sakhiat, wa toh du oo donhi napyrdi ki Blai wa em ha pyrthai wa ye u im biang hadien wa dadep yap. Yeini, da pynsakhiat da ki yuthoh haka Testament wa thymme haki soo Gospel wa tip i kam ki, “Synoptic Gospels” wa kynthup ya ka Gospel u Mathaios, Markos, Lukas wa Ioannis. Ha ki lynnong ki dkhot wa kut yong kini ki soo Gospel da thoh bait chaphang ini i chah tynyap wei mih im biang u Jisu na yutep. Em chiboon ki yuthoh kiwa pynsakhiat yeini to u ya puræ won i chaphrang.
Ki Christan ha chityllup ka pyrthai da kynmoo pynemwarom ki ha ki rukom waphær waphær dei lehkmen leh sñiawbha kam heipor Christmas. Ya khana ki chaphang i chah chitom i chah tynyap wei mih im biang u Jisu deiwa lai yaseiñ, ya khawai pylleiñ Easter wei da bood sa ya kiwi ki rukom.
Ka Chaad Sukra won deiwa tbian u ong O toh ka chaad ki jaitbru Pnar kawa yeiñ sakhi kawa pynyoo pynchynna chakhmat ka pyrthai ya ka riti ka dustur yong ki bru Pnar. Kawi ka daw wa kongsan wa pynman ya kani ka chaad toh wow pdiang warom yei wan i por pyrhaw, i por wa sdang khai im khai lung biang ki ranem ki phlang ki yuthung yutep. I lehkmen leh sñiawbha ki warep wariang wa chisien chi snem hachwa wow bet wow thung yow symbe u phniang. I sñiawngooh sñiaw warom yaka Bei Ramaw Ramchi neibhah i bha i sbun i kyllooid mynsien yong ka, wa hajrong yong ka yoh i u chong u sah heini ha sla pyrthai, haka snieh ka sbur yong ka yoh i u rep u riang u thung u tep. Man ko kam ka bei kawa psa wa pjah wa pusai wa pyntun ya i da i yimbar yimthiang yong ka heijooh i por leh bood lang sei e ngooh e dem ya U Blai Tre Kirot ya ka Bei Ramaw Ramchi wow yoh yei kyrkhu kyrdoh wow man miat man bha i rep i riang, i thung i tep, u symbe u phniang. Boon kiwa sñiawthooh wa ka Chaad Sukra toh ka lehniam ki khon ka Niamtre næ, han manda ap da sñiaw wei manda puræ yei thoh ki waheh wa chemphang heiyatoh wa kani ka chaad tæ batai ki wa kani ka chaad ym em u man ko du heiyatoh wa ka chaad lehniam lane katæ ka Religious Festival wa ong ki hei ktien pharæng, man haroh ko ka chaad heiyatoh waka riti ka dustur (Cultural Festival) yong i ki jait Pnar.
To kattu yn ya thooh i yei sakhiat heiwon chem i wa em i yajan ka Easter Sunday waka Chaad Sukra.
I kyntien Easter ym chem i wa thoh haka Bible, neitæ ka tarik wa sahnarphna ka tarik wa yap wa tlep ki yow Jisu wa ka tarik wa khai im biang u ym em chem i haka Bible.
Ki bru stat Bible ong ki wa da tynyap wei mih im biang u Jisu jia i ha ka 30 tarik u bnai March yong u snem 30 AD. Tæ hawa kamtæ ileh thiej ym kynmoo warom ki ha kani ka tarik man-u-snem kamwa leh ya ka Christmas? Kani da man ko kawi nawon hi ka mat ka yura kawa daw ya batai won i hadien. To yn lai chwa i ya kani chooh ka phang kawa da booh.
Eh bha u chem thij næ yei tre ini i kyntien Easter, wei em leh chiboon kiwa batai chaphang yong ka. Napyrdi kini kiwa batai waroh, iwa ya ngait lang kiwa boon ki bru stat tæ yeiwa khana uwi na ki Langdoh niam heijooh i por leh u bru stat na England ha ka spah snem ka wa 8 wa kani ka ktien Easter wan ko naka ktien “Eastre” i pyrtuid iwa ki jaitbru Anglo Saxon khut pyrtuid ki yaka Blai pyrhaw lane ka Blai pynbha yuthung yutep yong ki (Goddess of spring and goddess of fertility). Ya kani ka Blai jooh e warom ki ha u bnai April man-u-snem, jooh pynemwarom ki ya kani ka Blai yong ki haka 21 March (Vernal Equinox) wa man ka sngi kawa ryngkat kat jooh i sngi wei miet wei da sdang ka samoi wa thymme (Spring).
Sa kawi won ka parom yong ki jaitbru Greek won, khana ki chaphang yei wan ka Persephone ka khon yong ka Blai Demeter, ka Blai yong ka ramaw ramchi nei chong rieh tngen yong ka hapoh ramaw, wa dei wan biang yong ka man i dak yong i khai im biang yong ki jait wa im heipor pyrhaw nei yohthiah yong ka waroh chi tlang.
Ki jaitbru Phrygia won ngait ki wa u Blai yong ki lai thiah noh u heipor tlang nei kjam nei dait thah, na itæ i daw jooh pynman ki dei lehkmen næ da ki tamasa deiwa chaad wa tem haka sngi Vernal Equinox wow kyrsu thiah ya oo na iwa yoh thiah u.
Da kini i yutip haneiñ, ngait oo jan phi ki lok kiwa puræ leh ym artatien de phi wa em i yajan bha hapyrdi ka Easter Sunday waka Chaad Sukra. Neibhah i tynre yong ka Easter Sunday leh mih ko na kini ki parom yong kini ki jaitbru wei pynemwarom ki yei sdang khai lung, sdang lber ki ranem ki phlang ki syntu ki skud ki jhoor ki jhep ki yuthung yutep, heijooh i por leh e ngooh e dem e warom ki yaka Blai Ramaw Ramchi yow yoh i kyrkhu kyrdoh iwa sarot tam hei rep hei riang hei thung hei tep, yow man miat man bha u symbe u phniang. Ki waheh yong ki Balang Christan leh da chim ki na kini ki waroh wow kynmoo pynemwarom yaka sngi Easter Sunday, ka sngi kawa u Jisu Christ da im biang u neiwa yap. Sa i ki Pnar leh pynman i ya ka Chaad Sukra ha kani hi ka rukom kamwa da kdaw haneiñ.
