Shillong: Ka sngi wa ar wa kiwa chong dai madan (Hawker) ha Shillong da yeiñ pyrchah ki ya ka sorkar yei chah kyrriah ki na ki thaw wa chong dai ki, da pynman ha ki bynta ka Laitumkhrah, Jingkein, Jailroad wa ha Polo ynne ka sngi.
Ki kyndon wa kiwa chongdai madan da paan na ka sorkar toh yow pyndep ya ki kyndon ka aiñ kam wow tipmit ya kiwa chong dai deiwa pyndep ya ka survey. Kam ka dak wow pynbor ya ka sorkar wow pyndep ko yeini waroh kiwa dai madan da yeiñ ki ha ki thaw wa chong dai ki deiwa wa rah leh ya ki kot wa thoh yei pyrtuid yong ki, ki mar wa dai ki wei wa la katwon snem da dep chong dai ki.
Kani ka yeiñ pyrchah da tip ya ka leh kam ka “I am a Hawker” Campaign.
Ki kattu katni ngut ki bru wa yoh u yaklam ha kani ka sngi toh kini ha wah:
Ka Sarojini K Shabong wa u Didimus L Nonglait toh ki chi kurim kiwa na Tyrsad da wan ki cha Shillong yow dai jhoor dai dakha ha yaaw Polo hadien wa yap khih ki ha i rep 30 snem nachwa.
Kini ki chi kurim da dep chah beh ki na i thaw dai ki la ar sien tangwa ong ki wa ye ki u psa ya ki 6 ngut ki khon ki deiwa chong dai cha rood sarok.
U wi u khon ki da pyndep Computer Engineering, u wi M.Com wa ka wi ka nurse tangwa ym em ye ki u yoh kreh hapoh ka jylla neidaw wym ye ki u pynbaam tanka ya ki heh ki haiñ.
Ka Marylabi Sangma wa ka Gratimoni G. Momin toh kiwa wanrah mar deiwa lai da ka Bus miet cha Resubelpara yow wanrah ya ki soh ki pe wa dai kiwa boon ki Garo wa chong dai ha Polo wei ki mar wa wanrah ki toh kiwa ka-it bha ki bru u baam kam ki datham, wa ki jhoor khloo wa ym em wa yoh ha Shillong.
Da yoh u yachem leh wa ki manbei wa wan dai ya ki jhoor wa rep ki na ki kpær yong ki ha yung ki ha Mawpat.
Da yaklam leh ya ki arngut wa dai kseh ha luti Jailroad wa mih ha Polo ki wym sniawthooh yei wa cha leh beiñ ki.
U Editone Syiemlieh na West Khasi Hills jooh kreh bylla u kam u mistri tangwa neidaw wa duna waræ i bai nongsngi da rai u wow yeiñ hei yong oo hi ki kjat deiwa dai jhoor ha jan ka Petrol Pump, Jail Road. 
Ka Jessyca Syiemleih na Lumparing heipor 2 waje i sngi wan chong dai jhoor ko wei na chwa da kreh nongsngi ko cha yung ki bru, deiwa yarap poisa ki tre yung wa kreh ko da ye ko u sdang u dai jhoor. Da ong ko wa ini i dai jhur da e ko ya ka i por wow pait khon ko kamjooh i sarong wa ye ko u yeiñ hajrong ki kjat yong ka hi neibhah heipor wa kreh nong sngi ko hei por wa kjut leh hap lai kreh bait ko.
Mynstep ka 3 tarik daw pteiñ ya kani ka I am a Hawker Campaign ha i bynta ka Police Bazaar, G. S. Road wa ha Motphran nadooh 11 waje i step hadooh 1 waje i sngi.
Discussion about this post