U Wandonbok Jyrwa uwa man u Chairman ka Meghalaya Joint Action Committee of Commercial Vehicles (MJACCV) da ong u wa ka seiñ daw chong ko ya ka yalang ha ka 13 tarik kani ka tayaw yow rai chooh chooh ya ki yakhih wow dang wan. Da ong u wa i wym bna ka sorkar ya kani ka yakhih man ko kamwa kheiñbeiñ wei yoobeiñ ya kiwa yah kari kamai, wei lada ka sorkar kwah ko wow pynyoo bor, ym yohsa wa hap lai chakhmat da ki yakhih kiwa eh.
I yakhih yong kiwa yah kari kamai hapoh ka Meghalaya Joint Action Committee of Commercial Vehicles da lai ko kattu da jan chi tayaw, tangwa hadooh katni neiliang ka sorkar wa u Montri ka chnat Transport, u Sniawbhalang Dhar dang suki hi-eh ki, laitnoh du nei pynbna na ka sorkar ha ka sngi Bibar wa da dep wa da pynhiar ya i dor yong i Petrol wa Diesel da T.2. Ynne ka sngi neiliang ka MJACCV da pteiñ ko yei yakhih deiwa chong kyllaiñ mynngor ha Madan Malki, wei ha kani ka yakhih da yoh chooh chooh ya i kyrchaan na kiwi leh ki seiñ.
Hawa kylli hajrong i pyn-eh ka sorkar, da pyntip u wa kam kiwa yah kari, da pyrchang ki wow yachem na i por cha i por ya u Montri ka chnat Transport tangwa ym jooh yohlaad ki neibhah wym jooh em u.
U Jyrwa da ong u wa ka seiñ daw yang ko hanla mutlop ka sorkar, wei daw lai chwa da ka yakhih wa jai jai, tangwa lada ka sorkar ka pynbor wow hap u leh da ki kaam, deiwa ym yohsa daw chim ya katæ ka luti.
Hawa kylli, da ong u wa ka yakhih yong ka MJACCV toh neibynta ki paidbah, wei ki pynbaad yong ki kattu katni toh i sñiaw yong samen, heiwa da pynrap leh wa lada kiwa yah kari ap ki yei tyrwa yong ka sorkar da toh wow pyndam noh ya ka yakhih deiwa pynku ya i dor bai kari, tangwa da ong u wa ka seiñ ka pyrkhat ko ya ki paidbah neibhah kiwa pynemkaam ya ka kari kamai ym toh ki bru kiwa mahajon.
