Ha ka kyrwoh wa da phah lang daka Khasi Students’ Union (KSU) waka Shillong Socio-Cultural Assamese Students’ Association (SSASA) heiyatoh wa iwa jia ha chnong Mukroh heiwa da dooh yei mynsien ki 5 ngut kiwa chong chnong kani ka chnong wa uwi u Forest Guard ka Assam iwa da jia haka 22 tarik uni u bnai.
Neiliang ki ar seiñ da beiñ ki ya ini wa jia deiwa pynche wa i yakhih ymtoh hapyrdi ki Khasi wa ki Assamese tangwa pyrchah yaka sorkar Assam deilang waka sorkar Meghalaya ki wym bien u pynbait pood la 50 snem iwa da wanrah yei dooh ki mynsien bru wei man iwa sñiawthooh yeiwa chrai ki paidbah tangwa ha kam ini i por toh u pynneh yei sñiawthooh hapyrdi ki Khasi wa ki Assamese iwa da em nadooh ki por wa da rim.
Da e nongmuna yei yatoh lok nadooh ha ka khayi pateiñ kamjooh heipor ka thma heiwa ki chipai wa siat khnam Khasi da krehlang ki wa u Genral Lachit Borphukan wow yaleh pyrchah ya ki Mughal heipor wa wan hiar thma ki.
Kamjooh da ong wa ka KSU deilang waka All Assam Students’ Union (AASU) da emlang ki hapoh ka North East Students’ Organisation (NESO) pyrchah ya kiwa psiah pyrchah ya ka aiñ chapoh ka ri.
Neiliang ka SSASA da ong ko wa da kyrchaan ko ya ki Khasi ha ki snem 1970-1980 ha ki yakhih pyrchah ya ki baar ri wei da ya krehlang leh wow pynkhlan yei yatoh hapyrdi ki Khasi wa ki Assamese wa em ha Meghalaya.
Kamtæ da kyntu ya ki paidbah wym yoh u klam, u thoh ha ki Social Media iwa ye wow wanrah yei sñiawyaphær jaitbru tangwa wow wanrah yei ya sñiawthooh yow ye u im deiwa suk.
Ki ar seiñ leh da dawa ki wow booh ya ki Police Outpost ha ki thaw khappood wa ki thaw wa em i ya kajia wei wow pynchitom ya kitu kiwa emkti wow siat.
Ka Wyrta wa phah da u Donald V Thabah, GS ka KSU wa u Surajeet Hazarika, President ka SSASA.
