Shillong: U dkhot ka NITI Aayog u Dr. Vijay Kumar Saraswat ynne da ong u wa ka sorkar India kheiñkor ko ya ka thaiñ mihsngi ya kawa tip leh kam ka North East kam ka thaw wow pynpliah wei wow pynkrehkaan ya ki scheme wa ha rukom wow kyntu kynrong ya ka imlang sahlang ha ka thaiñ liang wanang.
Da ong u wa lada toh ha ka liang i stat i tip ka juk wa katni, ki kaam rep, i chait i khiah wa kiwi kiwi ka sorkar India da chimkhia ko yeini hawa e klam ha ka Convocation wa 24 yong ka NEHU ynne ka sngi.
Da yooluti u wa i thrang wa i angnood ki paidbah kani ka thaiñ ka sorkar India leh daw chimkhia ko wow pynwandur ya kani ka thaiñ kam ka thaw wa da roi da paar bha kamwa man ha kylleiñ ka ri.
U Dr. Saraswat, toh uwi na ki stat sayan uwa da emkti wow chna ya u Prithvi Missile heiwa da ong u wa em sa le tylli kam kini ki missile wa da mang kyrpang wow yada ya ka thaiñ mihsngi.
Chooh chooh da ong u wa ye hi u pynmih kam kini ki stat lada ki sorkar jylla krehlang ki wa ka sorkar bei.
Ka National Institution for Transforming India (NITI Aayog) kawa da sdang ko da ka sorkar u Narendra Modi Government wow wanrahsalan ya ka Planning Commission.
Hei yatoh wa i rukom krehkaam wa le snem wa kyrpang ka NITI Aayog da ong u wa daw chong pyrkhat wa jar jiar ki sorkar jylla wow pyrkhat ya ki kaam pyrroi PM kamwa da ong u Montri Rangbah ka ri yow sñiawthooh yei eh i khoo yong ki.
Hei yatoh wow pynneh yei yabhah poisa wa 90:10 da pyntip u wa NITI Aayog da pyrkhat ko yeini weika sorkar bei da chimkhia ko leh yeini khamtam neibynta ki jylla ka thaiñ mihsngi.
“Chong i man ka le bnai hei yatoh wa ka mang poisa wa da e cha ki District Council wei ha uni u bnai daw chong yalang biang i heiyatoh wa ki” da ong u Saraswat.
Discussion about this post