Ka Block Congress Committee yong ka 5-Sutnga Saipung Constituency ynne ka sngi da pynskem ko ya 54 tylli ki Unit wei da pdiang burom leh ya kiwa yahkhmat ka NPP kiwa da wan psiah cha ka Party Congress haka yalang wa da pynman ha chnong Lamyrsiang ha pchem yung u kyrtong ka Congress hi u Vincent H Pala uwa man u MP wa katni naka Shillong Constituency kamjooh leh uwa man u President ka Meghalaya Pradesh Congress Committee (MPCC).
Ha kani ka yalang u Vincent da pynbna paidbah u leh ya u Thicklang Chyrmang, President warim ka NPP naka 5-Sutnga Saipung Constituency kam u President ka Party Congress u wow pait yaka East Jaiñtia Hills waroh kawi.
U Vincent hawa klam ong u hanla man MP makna u leh, ha oo hi i yakhun Election MLA chim u wa man ko i jooh hi neibhah toh ka chakri paidbah, wei wymtoh leh i hiar kyrdan neibhah la khian næ heh leh ka kam chakri hi toh ka kaam chakri.
I rai kut yong oo wow yakhun toh hadien i pyrkhat yillu, deiwa ong wa la waroh kiwa em i tip i stat pyndem ki haki heh spah iwa mut manda jop ki leh wym em katæ ka chakri yow paidbah, tangwa u chakri ki neibynta i myntoi yong ki hi. Wei la kat iwa khih wa kreh ki paidbah leh u ngat bait ki hei chah khrong dan.
“Nga sñiaw O wa ka kaamram yong nga kamwa u Blai da e u ha nga ka sap toh u man chlur O wei em i bahkhlieh neibynta ki paidbah,” da ong u Vincent.
Pynkynmoo haroh u wa heipor wa kreh u kam u sahep ha PWD yoo u wa u bru wa kreh kam u Peon leh la chakri bha u yei kaam, ki bru burom ki oo, katwa la man sahep makna leh lym chimkhia hei rukom chakri wym em wa burom ya ki.
Khana u leh wa hadien wa mih u MLA wa katni u Shitlang Pale naka Congress, da pyrchang thooh kyrtong tangwa neidaw waka Constituency toh kawa boon chnong wei heh krai bha ki thaw ko da mut leh u randien noh ki, neitæ haka ya chong pyrkhat ong u boon kiwa kreh Party rai bait ki u pynneh yaka burom ka Congress haka 5-Sutnga Saipung Constituency neibhah ha u 2018 napoh Ri-loom Jaiñtia du na kani ka Constituency wa jop ka Congress kamtæ ya tyrwa noh ki u yakhun da oo hi.
Hajrong i chah tyrwa ong u wa chimpor bha ya oo wow rai neibhah najrong wa dang man MP, man President ka MPCC, hap u wow yakhun leh naka Constituency wa heh paar tam hapoh Meghalaya, tangwa hanla kattæ leh wym em sñiaw dooh kyrmen u neibhah u Blai da emlang u chirup wa oo haki 13-14 snem kam u MP hei chakri wa lait nei chah pynbaad la haka ñiam ka rukom, ki chnong, ka chongsuk chongsaaiñ wa kiwi.
Kamwa man katte ong u ka BJP toh kawa hakhmat dooh wa wanrah i pynsñiawthooh bakla ya ki paidbah heiyatoh waka Congress deiwa sooh buit ha kylleiñ wa i pynbaad wa boon rukom, tangwa ka Congress hi toh kawa pdiang lut ya waroh katwa ka BJP, NPP waka UDP kiwa ya pynbaad iwi ya iwi.
Kiwi won wa e i klam toh u T. Pasleiñ na Sakhaiñ, ka T. Kympad na Tluh, u L. Suchiang, President Borghat Unit, u T. Chyrmang, u B. Bamon, Montri warim ka sorkar jylla uwa jooh man u CEM warim ka JHADC wa kiwi kiwa da yaroh ya u Vincent H Pala wa toh u bru wa biang tam u man MLA haka thaaiñ, wei em sakhiat u leh i angnood u chakri yaka thaaiñ wot hawa dang man u kam u MP katni.
Chooh chooh ong ki napyrdi ki 3 ngut ki kyrtong 2023 wada lai luti bha chakhmat na kani ka Constituency chem ki wa du u Vincent hi wa biang tam na ki waroh.
Ha kani ka sngi ka chnong Lamyrsiang da e kti haroh ko ka song pisa yarap kam ka dak u pyn-ehbok pyn-ehnasib yei lai luti yong oo.
