Ka Village Health Council yong ka chnong Mihmyntdu chirup i krehlang waka Dorbar Chnong Mihmyntdu ynne ka sngi da pynman ki yei pynsñiawthooh paidbah hajrong i maa neiwa dih sikret, baam duma deiwa pynman yalang ha Hall ka Lumpyrdi Mihmyntdu kamjooh leh i lai Rally wa chimbynta da waroh ki skur wa em ha Mihmyntdu nadooh kiwa sikai, ki khynnah skur deiwa rah lang ki Placard wa da thoh ya ki kyntien pyrchah dih duma sikret deilang i kbai e Wyrta tymbud sarok wa lai kjat ki.
Ha kani ka sngi da emlang leh ki bor pynlai chnong ka Mihmyntdu, ki bor pulit, ki Doctor, u BDO ka Thadlaskeiñ C&RD Block wa kiwi kiwi.
Kani ka pynsñiawthooh paidbah man ko leh kam chibynta ka National Tobacco Control Programme, heiwa da kyntu ya ki paidbah wow dam ki u dih sikret duma khnang yow lait smat kut i im ha pyrthai dei wow chim i raikut wow ong bait ym bien ya u sikret duma, neibhah wym pynmyntoi u iyi iyi leh.
Kiwa klam nadooh u Dr. Khadwiwed Chyrmang, Asst. Prof Department of Commerce & Management Northeast Adventist University, ka A.M. Lamin, Block Programme Manager ka National Health Mission, u Waheh Chnong ka Mihmyntdu, u A. Phawa da kyntu joor ki wow kiar nei dih sikret, baam duma khnang yow yoh yei chait i khiah wa biang.
U OC ka Jowai Police Station, u S. Manar hawa klam da batai pynche u hajrong ka COTPA Act kawa man ka aiñ wa ye u pynchitom ya kiwa dih sikret ha ki thaw paidbah wa kynthup nadooh ki yaaw, ki haat, ki kari kamai wa kiwi ki thaw wa pynemkam yonglang.
Ong u wa lada chem boonsien ki jooh bait ki bru wa leh pyrchah aiñ daw chah kset haroh ki 6 bnai najrong ka kuna, neibhah i dih yong ki ktah ko ya kiwa em hajan næ wot ha yung ya ki khon ki kti.
Kamtæ kyntu u wow man kiwa syndong neibhah lada yoh ki khon wa chait wa khiah, ka mynried yong ka imlang sahlang leh man ko kawa chait wa khiah wa miat wa bha.
Kyntu u leh ya ki khynnah skur wow klam ki ya ki bei ki pa ha-yung ha-sem hajrong i sih neiwa dih sikret baam duma.
Ka Dr. R. Talang, District Nodal for National Tobacco Control Programme, Jowai Civil Hospital hawa batai bniah hajrong i ktah u duma yei im ki bru, ong ko wym toh ktah u du kat yei pohktien tangwa ya waroh i doh i pran u bru.
Neitæ ktah u yei im ki bru deiwa khatæ 7 hadooh 10 snem i rta yong u bru. Ong ko ha India hadooh 1 Million ki bru yap ki neiwa pynemkaam duma wei ka Meghalaya man ko leh ka jylla wa ar wa khlan ki bru wa pynemkam duma wei boon leh kiwa yap neiwa dih sikret wei baam duma.
Ha u duma ong ko em hadooh 7 hajar tylli ki Chemicals wei hadooh 70 tylli ki Chemicals toh kiwa ye u pynkylla chei kjut Cancer deiwa ktah ya ki doh jem hapoh i doh i pran u bru.
U BDO ka Thadlaskeiñ C&RD Block, u Heimon Niang ong u wa u sikret pynjæd u ya ka kata u bru dep neitæ pynjæd u sei sula tæ pynmih tdem u sa na khmut.
“I yakhun yong i yow sikret man i kam ki blang wa im hapyrdi ki suri, neibhah du chi kaap ar kaap da em wot wa dai na itæ i daw toh u man kiwa syndong kiwa sian wym toh u chah baam ha ki suri kiwa man ki sikret,” ong u BDO.
Kyntu u leh ya ki khynnah skur kiwa da yoh i batai pynche hajrong kani ka phang wa manda poi yung u klam u pynsñiawthooh ki ya ka bei u pa.
Discussion about this post