Ka takit heiyatoh wa i chah siat yap u General Secretary warim ka HNLC, u Cheristerfield Thangkhiew ha i step synyaw ka 13-08-21 kawa da leh da u Justice T. Vaiphei kawa da dep u wow e kti cha sorkar, da wanrah ya ka ynne ha ka sngi nyngkong ka dorbar ka Meghalaya Assembly.
Kani ka takit kawa da e cha kiwa thoh khubor toh kawa da tympleh yei pyrtuid yong waroh kiwa mih pyrtuid ha kani ka bui (Report) lait noh uwi.
Kani ka Report da sdang ko deiwa ong wa ym ye wow beiñ yei lai kynreh ki pulit yei yung u Cheristerfield neibhah da biang ka takit wa da leh chwa najrong wa da dep chah pynbaad u wa emkti u ha kiwa boon ki kaam nadooh ki rahbor ya ki bru, i dawa poisa, ki kaam pynyap bru wa kiwi kiwi de.
Iwa da yah wow lai ki pulit cha yung u Cheris dei thmu wow kem ya oo won ha katai ka miet toh heiyatoh ki tympdung Bomb kiwa da jia nadooh u 2020 wa ha u 2021 da ka HNLC heiwa ha ka 26-11-20 da jia ha Yaaw Sookilo, ha Star Cement Factory ha ka 12-02-20 kiwa da kitkhlieh da ka HNLC wa uwi u Bomb IED u wym em pdung ha Meghalaya Coke Factory wa em ha Bther, EJH.
Ha u 2021 da tympdung Bomb ha Police Reserve, Khliehriat ha ka 13-07-21 heiwa da mynsoo arngut ki pulit wei da ktah bha leh ya ka yung sah ki pulit (Police Quarter). Heiyatoh wa ini da kem ya 12 ngut ki bru heiwa ar ngut na kini kiwa chah kem da khana ki wa da emkti ki ha i tympdung ya kiwi ki 3 tylli ki Bomb IED wei da leh ki yeini deiwa phah u bru wa tip kam u Sanbor Pala. Hadien ini ka HNLC leh da kitkhlieh ko ya ini wa jia.
Hadien ini wa jia ha Khliehriat da thung da ka Special Investigation Team (SIT) kawa da chem wa u bru wa pynlai ya ini waroh toh u Sanbor Pala uwa su ya kiwa chna Bomb IED kamjooh wow lai tympdung wei da yaklam u wa kini ki bru da u Phone Number uwa na Bangladesh.
Ha i takit wei da boodien yow tip uyi oo uni u Sanbor Pala da chem wa ye wa em sa uwi u Bomb uwa da chna tangwa ym pu em tympdung wei deiwa phla uwi na kiwa chah kem da ong wa daw em i yachem hapyrdi ki arngut ha ka 19-07-21 yow pdiang ya u IED lane wow yoh poisa wei deiwa booddien ki pulit da chem wa ha katai ka sngi ha Motphran da yoh yei tiar na uwi u bru wei da kem ya uni u bru hawa liwan u deiwa ksoh ya oo ha Mawryngkneng wei da e kti ya oo cha ki pulit ka Khliehriat wei da chem ya ka poisa wa T. 60,000 na uni u bru.
Hawa booddien won na ka CCTV wa em ha Motphran da chem wa u bru wa yachem wa uni u bru toh uwa sariem bha i rukom man i doh i pran wa u Cheristerfield Thangkiew.
Ki pulit da pteiñ ki yei booddien yow tip uyi oo uni u Sanbor Pala uwa da dawa poisa hei pyrtuid ka HNLC na kiwa boon ki bru deiwa maham wow tynyap ki kamjooh kiwa hayung hasem lada ym su ki wei da em uwi na kiwa chah dawa poisa uwa da e ya ka Phone Recording cha ki pulit yeiwa klam u Sanbor Pala wei da chem wa da Phone u da u Number uwa na Bangladesh uwa tip chwa ki pulit uwa da pynemkaam heiyatoh wa i tympdung Bomb ha Khliehriat wei manda ap bha yei rukom klam wa i sur da chem toh u Cheristerfield deiwa nujor wa ki Recording wa klam paidbah u ha ki Recording wa da em chwa ki pulit kamtæ ki pulit da tikna ki wa u Sanbor Pala wa u Cheristerfield toh u jooh u bru wa da emkti ha ki kaam tympdung Bomb deiwa pynemkaam yei pyrtuid kam u Sanbor Pala wei toh oo wa e poisa cha uwa chah takit hei tympdung Bomb ha Khliehriat.
Hadien ini ka takit da poi ko cha i pdung Bomb ha Laitumkhrah ha ka 11-08-21 iwa da bahkhlieh ka HNLC wei ki pulit da yoh yutip ki leh wa ha ka 12-08-21 wa ye u em i tympdung Bomb ha Police Bazar, Punjabi Lane, Secretariat, Bara Bazar wa kiwi de ki thaw katkam wa da phla da uwi na kiwa chah kem heiyatoh wa i pdung Bomb ha Khliehriat.
Kamtæ ki heh pulit da chong yalang ki ha ka 12-08-21 wei deiwa pait ya waroh ki sabut, ym em de artatien yei emkti u Cheristerfied weiwa daw ye u em biang i tympdung Bomb nadooh ka 13 hadooh ka 15 tarik u Naisaphra, hajrong ini da chim ya ka rai da u DGP ka Meghalaya wow lai kem ya u Cheristerfield chwa wow yoh laad u pynwiar pyndooh ya ki sabut wa pynyoo wa emkti u ha ki kaam tympdung Bomb ha Khliehriat wa kiwi de.
Hacwa u lai kem da pyntip wa ye u em kiwi ki dkhot ka HNLC wa sah lang ha yung u Cheristerfield kiwa em tiar deilang wa ki khon u. Manda poi ha lait pchem itai i yung da kbai wow krehlang wa ki pulit wei hadien wym em jubab da psiah lyngba ka Gate khian wei manda choh dwar leh ym em wa jubab kamtæ da tympiah ya ka dwar wei da psiah chapoh yung heiwa u pulit wa nakhmat katwa dang psiah u chapoh hei doom lyngba ka Corridor da mih syndet uwi u bru wa da tia dei phet wei deiwa rah kti kam wow dat heiwa u pulit da ong u “Sangeh! Sangeh!” tangwa ym sangeh wei manda jan kamwa 2-3 phut kam yow yada ya idæ, uni u pulit da siat u chi kuli. Wei manda pynche yei bordiñ ka yung da chem wa uwa chah siat toh u Cheristerfield wei da chem leh ya ka tari.
Kamtæ da Phone Ambulance yow kit ya uwa chah siat wei ki pulit da kynreh ki yei yung yow chem ya ki sabut iwa da chimkti da ki pulit ka East Jaiñtia Hills.
Heiyatoh waka miet wa lai kynreh yei yung u Cherister, ka takit da u Justice T. Vaphei da chem ko wa ki pulit ym em ki ya ki Night Vision Device namo ki yitkhmat wa deiñ yow chynna dei miet, da ong leh wa ym toh wow lai kynreh/lai kem na yung u bru dei miet yow lait nei mynsoo kiwi. Da tyrwa leh yei pynemkaam ya ki Tear Gas hawa lai kynreh ya ki yung bru.
Da ong leh wa da toh wow pynsñiawthooh ya ki pulit yei hok manbru, wei neini chakhmat lada pynman ya kawon kawon ka lai kynreh toh u yah lang wa ka Ambulance yow lait u dooh yei mynsien bru.
Khaddooh da ong wa iwa jia ha yung u Cherister ha ka 13-08-21 heipor kamwa 3:00 waje i step toh iwa da pynemkaam bor palat da ki pulit iwa da yah chei yap iwa toh u ye u yait. Da ong leh wa ini i psiah hei doom khlem biang ki tiar ki tar kam ki Nigh Vision Device wei dei psiah yabor toh iwa bakla neibhah i thmu toh wow kem donhi ya u bru wei lada yang ki ar kynta deiwa kær kut yei yung wei deiwa pakhot da ki Tear Gas daw pynbor ya kiwa em hapoh wow mih ki cha lait yow kem deiwa suk.
Kamtæ da ong wa ki pulit wa psiah nyngkong toh kiwa da leh yabor wei toh u bahkhlieh yeini wa jia hadooh wa poi chei yap iwa toh u ye u yait.
Neiliang ka sorkar da ong ko wa daw khut ya kini ki pulit yow pynche ki hajrong ini.
