I yatan tylle i knieh burom ki daw wym poi thong i dawa Civil Sub-Division ha Laskeiñ | Khut ka JSM wow yatylli

Ka seiñ Jaiñtia Student Movement (JSM) kawa da lai luti nadooh u snem 2015 neibynta u dawa pynku kyrdan noh ya ka Laskeiñ C&RD Block cha ka Civil Sub-Division, ynne ka sngi da pynman yalang paidbah ko ha madanbol ka chnong Mukhap kawa dang haap hapoh ka Laskeiñ C&RD Block, West Jaiñtia Hills District yow ap u sñiaw yei sur ki paidbah heiyatoh wa kani ka mat dawa.

Ha kani ka yalang najrong ki paidbah, ki bru bna naam ka thaaiñ kiwa da wan e kyrchaan, da emlang u MDC ka Shilliang Myntang, u Daemi Liam, u Nehemayah Tyngkan, u Ribok Biam, Asst. waheh chnong ka Saphai, u W. Suchiang, Sport Secretary ka chnong Mukhap, u Wanpyrkhat Lyngdoh, waheh chnong ka Tum Tum wa kiwi won ki waheh chnong deiliang ki bru wa stat wa sian.

U President Rangbah ka seiñ JSM, u Leningstar Rymbai khana u wa ya kani ka luti da lai ki nadooh i por yong ka sorkar Congress tangwa ym em yoh ki kawon kawon ka jubab, neitæ manda poi ka sorkar thymme ka MDA-I leh da lai booh biang ki dei thoh tangwa sahkut hi-eh ko.

Kamtæ hei thooh bniah yong ki yow tip yei daw, da lai hiar haroh ki chapoh ka thaaiñ Laskeiñ wow yaklam yachem wa kiwa yahkhmat chnong, ki Elaka, heiwa ka seiñ da chem ko wa em kiwa pynman Politics ya kani ka mat, wei da em i yataan tylle kwah burom da kiwa yahkhmat hajrong ini i kaam wei em won leh kiwa yahkhmat wa pyrchah yei thmu rhah burom.

Khana haroh u wa hei lai yaklam yong ki wa u Dy. CM, u Prestone Tynsong leh da jubab u wa dang paitbniah ki ya kani ka mat, wei ini pynyoo wa em i yaknieh burom.

Related posts

Cha Mawlai lai hiar ki pulit yow takit ya kawi heiyatoh wa iwa wiar ka khynnah na Umpling

October 12, 2025

Wiar sa kawi ka khynnah ha Shillong | Mih ki paidbah wow yarap thooh

October 12, 2025

Hadien wa chem ya kini ki daw, u Leningstar Rymbai ong u wa kam ka seiñ kawa yieñ hapyrdi, da chimkhia ko u hiar pynman yalang da ka hi ynne ka sngi yow yoo hadooh katwon ngut ki paidbah wa thrang u yoh Civil Sub-Division khnang yow yoh du kawi ka sur khlem i sñiaw yaphær lada em ha kawon kawon ka seiñ saiñ hima sima.

Hajrong i dawa Civil Sub-Division ong u wa lada kyruiñ chei boon bru, ka Laskeiñ C&RD Block da biang pura ko wow ku kyrdan ko cha ka Civil Sub-Division neibhah i boon bru da khynjoh katni cha  ka chi lak ngut.

Wei ong haroh u wa lada wyrchaw wa ka Amlarem Civil Sub-Division kawa em du uwi u MLA, ka Laskeiñ pathan ymtoh de u dooh ko yei man Sub-Division.

Kamtæ hajrong kani ka mat ong u wa lada ki paidbah wa kiwa yahkhmat wan ki haka jooh ka sur, kam ka seiñ smat ko wow sdang noh da kawon kawon ka kynhun yow toor pynche hajrong ka mat dawa Civil Sub-Division, wei u yakrehlang leh wot hadooh wow yahkhmat cha ka yungbichaar.