Ynne ka sngi, ka dorbar paidbah namo General Meeting ka Dorbar Chnong Mynkrem Shangpung ya kawa da khut da u Waheh Chnong yong ka, u Nidamon Chulet da man ko kawa chongchit wei ka wow sah khana parom khamtam hajrong i kaam wa yatoh wa ka karkhana Coke wa da thmu wow chna hapoh ka chnong.
Ha ka yalang da mih syndet i rai na kiwa kitkaam chnong wow ieh noh ya i kaam wa da kreh ki hapoh ka Dorbar Chnong.
Ini i ieh kaam syndet toh u Nidamon Chulet kam u Waheh Chnong, kiwi kiwa da ieh kaam kynthup ki ya u Wanmiki Iakai kam u General Secretary, u Lammiki Sayoo kam u Secretary ka VEC, u Damonhi Phyllei kam u President ka VDP wei kam u President ka Sport Club.
Heijooh i por da ieh kaam leh ki 19 ngut kam ki dkhot yong ka Executive Committee.
I daw wa kongsan tam wa da ieh kaam u Waheh Chnong wa kiwi kiwi toh hajrong i chah pynbaad na ki kattu katni wa da e NOC sop-sop u Waheh Chnong ya ka Coke Factory wei katkam wa pyntip u Nidamon, i e ya ka NOC toh da i rai yong ka EC hi waroh kawi.
U Nidamon da ong u leh wa i thmu ka EC wow e NOC ya kani ka karkhana toh wow wanrah ya ki kaam pynroi ya ka chnong khnang wa ki paidbah yong ka u myntoi ki.
Ini i rai wa syndet u Waheh Chnong wa kiwa kitkaam ka chnong kamjooh ki dkhot ka EC da pynkhyrngiat wei da pynsñiawsih i leh ya ki paidbah ka chnong.
