U MLA ka Congress na Rambrai-Jyrngam Constituency uwa da dep chah beh seiñ chipor (Suspend), u Kimfa S Marbaniang ynnin ka sngi da e u yaka chithi ieh noh yei man kam u MLA.
U Kimfa da e u yaka chithi ieh kaam ha u Speaker, u Metbah Lyngdoh wei ini da wai luti ya oo wow psiah noh u cha ka National People’s Party (NPP).
Kam wow pynkynmo wa ini wadep, ar ngut ki MLA ka Congress kiwa da dep chah Suspend wa kynthup ya ka Ampareen Lyngdoh na East Shillong wa u Mohendro Rapsang na West Shillong leh da dep ki wow ieh noh yei man kam ki MLA wei da lai psiah ki cha ka NPP yow pynkhreh yakhun Election 2023.
Ini da mut i wa kattu da em waroh 6 ngut ki MLA kiwa da ieh noh yei man MLA wa kynthup ya ki arngut ki MLA ka NPP kitæ u Benedic R Marak na Raksamgre waka Ferlin CA Sangma na Selsella wa u MLA ka AITC u Himalaya M Shangpliang na Mawsynram.
Kamwa man kattæ na ki 60 ngut ki MLA, da em sa du 54 ngut, wei sa arngut ki MLA ka Congress kiwa da chah Suspend leh daw ieh noh ki yei man MLA kitæ u Mayralborn Syiem na Nongpoh wa u PT Sawkmie na Mawlai kiwa da antaad toh kiwa daw psiah UDP.
