Kam chibynta wow pynkhreh wow kylliang Party noh neibynta ka MLA Election 2023, ki le ngut ki MLA wa kynthup ya u Samlin Malngiang, MLA ka Sohiong, u Hamletson Dohling, MLA ka Mylliem wa u Jason S Mawlong na Umsning Constituency, da e kti ki ya ka chithi ieh kaam kam ki MLA ha u Lamphang ka Yung Dorbar u Metbah Lyngdoh ha kamra krehkaam yong oo ynne ka sngi.
Hadien wa da ieh kaam noh kini ki le ngut, u lai psiah noh ki cha ka NPP heiwa u Samlin daw psiah u cha kani ka Party ha ka 10 tarik, u Hamlet ha ka 7 tarik katwa u Jason won ha ka 6 tarik.
Neiliang u MLA ka Mylliem Constituency, u Hamletson Dohling da pynsñiaw u wa i daw wa da rai u wow psiah cha ka NPP toh neidaw kiwa kyrchaan ya oo ryngkat wa ka Core Committee yong ka Mylliem Constituency kiwa da chong yalang wei da e yumut wow mih noh u na ka PDF ha kani ka kynti.
U Samlin Malngiang uwa man u MLA ka Sohiong Constituency da ong u wa i daw wa mih u na ka Party HSPDP toh neidaw wa dooh noh ya ka chuki Montri ha chiteiñ samoi krehkaam ka sorkar synrop, wei ini i e chuki toh iwa da chim rai chwa. Tangwa da ong u wa ki paidbah emkaam ki ya ka sorkar wa skem wei da kyrmen u wa ha kani ka kynti deiwa maya ki paidbah, ka NPP daw yoh ko ya ka kabu ksiar wow synchaar samen.
Heiyatoh won wa u MLA ka Umsning Constituency, u Jason S Mawlong, da kam u wa i daw bah hi wa mih u na ka PDF toh wa da mynjur da ki paaid ka Umsning, wei lada kwah wow kreh rap miat ya Constituency emkaam wow yoh ya ka sorkar wa skem kawa khlan bha ha ka jylla waroh kawi.
