Im i pyrtuid-sah i naam; Dei kynmoo warom-kynmoo maya ya u (T) Waheh Kambel Shullai

Jowai: Ka 16 tarik Naiynru yong u 2012 toh ka snem ka wow sahkhanatang sahkynmoo yow waheh Kambel Shullai (Baam kwai ha dwar u Blai), u tre wa chem wei pynwandur ya ka Eco-Friendly Crematorium kawi na ki rukom chna wa e yada yei miat i bha i man i long ki soodong sookun ka Bei Rymaw wei chiban man ko leh ka rukom chna wa yahaap wa ka juk stat science wei yarap ko hei wow pynsuk ya ki khon ka Niamtre wa ya kiwi ki bru wa pynemkaam ya kani ka thaw heipor wa pyndep ya ka niam yap dei thang i riñ najrong yong i Syiem Diñ.

Kdar kyrpang ya kani ka lyngkhooh snem yap yong u waheh Kambel Shullai wa yei man ka Eco-Friendly Crematorium kawi na ki rukom chna wa da sai da pynmih pyrthai nei jabieñ krehkaam wa sarot i yong-oo, yoo sakhiat wa man ko ka rukom chna kawa ki waboon walang wa sakhi ha kylleiñ ki chnong ki Raij dap ki du dei kyntien yaroh wei sñiaw makhane yow waheh Kambel Shullai han la boon ki wym tipmit næ yoh u yoo u sakhi yei dur i yong oo.

Katkam wa man hadooh katni katkam i yutip wayoh da ong wa kani ka Eco-Friendly Crematorium u waheh Kambel Shullai kawa da em hei pait i yoo ka Seinraij Jwai da yieñ ko hadooh 78 tylli heiwa napyrdi kini em kiwa da yoh u pynemkaam, em kiwa dang hapyrdi i kreh i chna neitæ won chooh chooh sñiawsuk leh u tip wa ka chnat Forest & Environment Department yong ka sorkar kam kawi na ka chnat krehkaam wa yieñ ha ka yurim wow yada ya ki dieñ ki siej, i khloo i kjam wei miat yirngam i man ka Bei Rymaw yaksohktilang ko wow pynkhroo yei naam wei pyrtuid u waheh Kambel Shullai dei wow e yarap leh cha ki chnong ki Raij wow chna ya kani ka Eco-Friendly Crematorium.

Ha lyndet ini iyi iyi waroh de iwi i kyntien u ong wa u waheh Kambel Shullai man sakhiat u, u khai u piar yong ka ri wa ka jaitbru uwa da pyndep hok yei kaamram heini ha sla khyndaw pyrthai kamtæ i por khut i ya nga ya phi ki pateiñ kani ka juk wym hoi u man i kiwa khapnap hei pyrkhat næ hun donhi wow chim yeiyi iwa da yoh na oo, emkaam won wow pyrkhat i, yi u leh i neibynta i burom wakhroo yong oo hakhmat ka pyrthai.