Shillong: Ka thaw wa pynman ya ka yaw Trade Fair ha Umsning, Ri-Bhoi District ynne i step synyaaw heipor kamwa 1:40 da kop diñ syndet ko heiwa da chah baam waroh ki 30 tylli ki dukan iwa da pyndooh nong hadooh T. 1.16 klur. Ha ini i jia ym em u dooh yei mynsien bru.
Katkam ka yutip wa da yoh da ong wa ya kani ka Trade Fair kawa tip kam ka Umsning Trade Expo-2019 da pynman da ka Unity Social Organisation na Guwahati chirup wa ka Seng Samla Umsning Proper (A) wei kiwa wan chimbynta da wan 30 tylli ki dukan na kylleiñ.
Da khana leh wa kiwa wan chimbynta ha kani ka Trade Fair toh kiwa na Manipur, Assam, Shillong wa ki tre chnong, da kheiñ wa ki tiar wa da wanrah wow dai da kynjoh i cha ka T. 1,16,70,000.
Hadooh ynne ya i daw wa kop ini i diñ ympu tip neibhah da jia i heipor synyaaw wei ki bru wa sah ha ki dukan leh dang yap thiah ki, wei ki pulit da pynman ki ya i takit hajrong ini.
Discussion about this post