Jowai: Kawi ka truck kawa em ya u number AS01JC4476 da chah baam ko hei diñ ynne i step synyaw hapyrdi i por 2:00 wa 3:00 ha Wapungskur, East Jaiñtia Hills.
Ki paidbah da yoo ki ya kani ka truck kit mooyong kawa wan na Sonapur, Assam cha Star Cement Lumshnong ynne dang step wei da pyntip ki cha ki pulit ha Ladrymbai.
Katkam ka khubor wa da yohlum, da pyntip wa katai ka truck kawa challan mooyong cha Star Cement toh kawa na Assam yong ka Company BSP katwa u mooyong wa kit ha katai ka truck 14 chaka de em u hadooh 60 Ton, wei ini i iñ ko da pynkulmar ya uwa yah kari, ki pulit kiwa ym pu ye u chem tre wa lada katai ka truck da kem diñ hi ko næ wa chah thang ko.
Ki chaka wa chadien wa u mooyong wa yoh i diñ da iñkhaw ki wei u mooyong leh da haap u cha rood sarok.
Kani ka truck manda poi ko ha Wapungskur da sih ko neidaw wa kheiñ uwi u Axle yong ka. Wei neiliang uwa yah kari da uiñ u cha Jowai yow lai thied Axle thymme katwa uwa yarap ya oo da yang u ha katai ka truck.
Uwa yarap da khyrngiat u na wa thiah hadien wa pdung ka chaka katai ka trok wei manda hiar u na kani ka truck da chem u wa da kem diñ ko.
Ki paidbah da pyntip ki wa kani ka truck da kem diñ ko na i daw wa u mooyong uwa wanrah na Sonapur, Assam toh uwa na Malaysia, USA, China hadooh na Australia, wei kini ki mooyong manda rkhiang lane tyrkhong palat ki ye ki wow kem diñ ha iwon iwon i por.
Discussion about this post