Ing ka guest house ha Khliehriat
Khleihriat: Kawi ka Guest House wa da tip kam ka Mom Maya Guest house kawa em ha Khliehriat East Jaintia Hills District, da kop ding ko haka miet 11 tarik u nai saphra hei por kamwa 8:30, wei i kopding iong ka leh m tip neiyi i daw.
Katkam ka khubor wa da iohlum i kop ding da man ko kawa rap jur heiwa da em kamwa kattu katni ngut kiwa mynsoo wei da pynkit iaki cha hospital.
Kani ka Guest house em ko harud u surok NH-44, kamjuh leh hajan ka BSF Sector Head Quarter Jwai, ha Khliehriat. Ka khubor wa da iohlum, toh du dei na ka daw i spit ki ophisar wow e iarap deilang wa ki 50 ngut ki BSF ka Sector Head Quater BSF Jwai, da ye u pynduh pyndam iei kop ding kamjuh da lait nei pur cha kiwi tawan ki iung waki dukan.
Iohkem ki pulit 6 tylli ki trok kit Mooiong na Kongong
Jwai: Ki Pulit ka Ladrymbai Beat House, East Jaintia Hills District Khliehriat, haka miet 11 tarik heipor kamwa 11:30 i miet da iohkem ki ia 6 tylli ki trok kit Mooiong kiwa mut u lai challan mooiong cha Guwahati.
Ia kitai ki 6 tylli ki trok, ki pulit da iohkem heipor wa pynman ki i takit iaki trok kiwa lai na katai ka thain hei iatoh waka hukum ka NGT. Ki dribar iong kitai ki trok wada chah kem kynthup iaka trok wa iah da u Shemlang Shylla, trok No, ML-04 A- 8149, u Hamarbamut Nongtein trok No, ML-10-2977, u Slendar Marbor trok No-ML-05 H-8525, u Jesonwell Marboh trok No, ML-10-2125, u Sliangmon Phawa trok No, ML-04-8642, wa u Hasland Dkhar trok No-Ml-04 A-4417.
11 ngut ioh kem khar Bangladesh ka FKJGP ha Bataw
Jwai: Ha ka 9 tarik janmiet heipor kamwa 7:30 ka sein Federation of Khasi Jaintia Garo People FKJGP Bataw Unit, da ioh kem ko ia 11 ngut ki khar Bangla na kawi ka thaw wa da tip kam ka Khlieh umsyngki kawa hap hapoh ka chnong Bataw East Jaintia Hills District katwa 3 ngut kiwi won da kynthnih ki najrong kari wei da iut ki.
Kitai ki khar Bangladesh wan ki na ka chnong Kwator dei wa thmu u lai lyngba ka Ladrymbai iow poi cha Jalaphet kamjuh da thmu ki leh iow kreh mooiong ha katai ka chnong.
Kitai ki bru wa da iohkem kynthup ia u Hobil Khan 20 snem, u Abdullah Khan 20 snem, u Jagir Khan 22 snem, u Sahat Khan 18 snem, u Sahadam Ahmed 18 snem, u Nasim Khan 25 snem, u Moor Alam Chaudhury 18 snem, u Muslim Uddin 21 snem, u Sahin Khan 19 snem, u Minaj Khan 18 snem wa u Habip Uddin 24 snem.
Hadien wa ka sein da dep takit ko ia kitai ki khar Bangladesh, heipor kamwa 11 waje i miet won pat dalai e kti ki cha ki pulit ka Ladrymbai.
Discussion about this post