Ynne ka sngi ha ka Dorbar Tlang ka JHADC, uwa yahkhmat ka Liang Pyrchah, u Awhai Andrew Shullai da wanrah u ya ka Motion namo ka phang yaklam heiyatoh wa i kajia hapyrdi ki Karbi wa ki Pnar kamjooh i kam yong ki ya ki thaw ka chnong Lapangap.
Hawa sdang u klam hajrong kani ka phang u Andrew da ong u wa i awri da sdang i heipor wa ah kba ki Lapangap katwa ka JHADC ym yoo wa leh ko iwon iwon hajrong itæ wot hajrong wa ki paidbah ka chnong da em ki ya ki kot ki sla thaw nadooh ki Patta, ki Land Holding wa kiwi kiwi nadooh ki snem 1977, 1982 kamtæ ter ter na ka JHADC.
Da ong u wa hawa yachem wa u Dolloi ka Elaka Shiliang Myntang (kawa man ka Elaka wa ka Lapangap hap ko) da khana u wa nachwa hawa lai pait ya ki thaw hapoh ka Elaka, ki Karbi mar ya beh ki da yut ki tangwa katni won da kam ki wot ya ki chnong ki thaw leh kamjooh.
Kamtæ da kyrpaad u ya ka Council wow chimkhia yeini kamwa leh ha Saitsama heiwa ka Executive Committee da lai pait ko ya ki thaw ka Council wei wow lai leh cha Lapangap wei wow phah leh ya ki bru wow sorjamin biang ki ya ki thaw khnang wow chngaaiñ ki paidbah ka chnong wa ki thaaiñ khappood.
Neiliang u Rikut Parien da kyntu u ya ka Council wow thooh laad wow chimkhia yeini deiwa pynskem yei mantre ya kini ki thaw ha khappood.
Da kynmoo u leh yeiwa klam u CEM ka Council, u Thombor Shiwat ha Psiar ha ka 17-09-2019 heiwa da kular u wow leh ya ki kot ki sla yong ki paaid khappood ha Council dei mynkna iwa da e mynsien ya kiwa boon ki paidbah neibhah deiwa em ki kot skem ka yurim wow pynyoo ya ka sorkar Assam kawa kwah bait u kyntoor ya u pood.
U Jamshaphrang Pohtam nawon da pynsñiaw u yei diaw mynsien neibhah ymtip ya ki daw wa kiwi u kwah ki wow wan kam ya ki thaw kiwa em hapoh u pood ka JHADC deiwa ban joor ya ka Exevutive Committee wow leh yeiwa emkaam hajrong ini.
Hajrong kini waroh neiliang u CEM ka Council, u Thombor Shiwat da ong u wa ini i kaam toh iwa eh yeiwa da tip da waroh wa leh embor ki Karbi ya ki Lapangap deiwa kubur wa hanlada em ki Lapangap ya ki kot ki sla wa biang wei ya kini da phah leh cha ka sorkar.
Da e nongmuna u leh ya u Zero Point ha Khanduli heiwa hanla em u pood leh, ka Assam yaleh bait ko wow kyntoor chapoh Meghalaya.
U Thombor da ong u leh wa i kyntoor pood da jia i leh ha Block-I wa Block-II weiwa i thmu ka sorkar Assam wa ka Karbi Anglong Autonomous Council (KAAC) toh wow lehbor heiwa u pynmih yei awri wow heh i thaw khnang wow yoh ki ya ka jylla thymme.
Heiyatoh wa ini i jubab u Thombor neiliang u Andrew leh da kyntu u ya ka Council wow chimkhia ko ya ini i kaam khnang wow myntoi ki paidbah ka Lapangap wa ha khappood.
Discussion about this post