U Working President ka Meghalaya Pradesh Congress Committee (MPCC), u Pynshngaiñ N Syiem da pynsñiaw u wa i long i man wa da mih ha ka ri India waroh kawi hadien wa da synchaar da ka BJP, u yarap i ya ka seiñ Congress wow jop boon ha ka Election MP kawa daw man ha u snem wow wan, wei kamjooh wow yarap leh ya ka Party wow jop biang na Shillong.
Hawa yatoh wa ka Shillong Parliamentary Constituency, da ong u wa kamwa man kattæ na Shillong ym eh ya ka Party wow pynyakhun bait da u Vincent H Pala uwa man u MP wa katni, tangwa da pynrap won wa ka Party hap ko wow bood leh ya ki kyndon kamwa jooh leh, ya boi em kiwi leh kiwa kwah wow paan Ticket, yeiwa daw phah ya ki pyrtuid cha ka All India Congress Committee (AICC).
Uwa yahkhmat ka Congress da ong u wa lada pait ya ka soodong wa i jia ha ka ri India waroh kawi, ka sorkar BJP da pyndooh noh ko yei hok yong ki paidbah ha Jammu & Kashmir, wei khamtam ha i jia wa katni ha Manipur kiwa ka sorkar BJP ym ye kow pyndoooh yei kynaad, ki paidbah ki sñiawthooh ki wa toh du ka Congress kawa man ka seiñ kawa ye u wanrah yei man kam iwi donhi hapoh ka ri India, wei kamwa da yoo wa kani ka la-ær daw yarap leh ya ka Congress wow jop biang na Shillong.
Hawa yatoh wa ki kyrtong na Tura Parliamentary Constituency, da ong wa ka Party chaniah ko hei stat kiwa yahkhmat na Garo Hills ya kiwon kiwon kiwa yoobiang ki kam u kyrtong.
Heiyatoh won wa ka Election MDC cha ki ar tylli ki Autonomous District Council (KHADC wa JHADC), da ong u wa ka Congress em ko i sñiawskem wow jop, neibhah ki paidbah hap ki wow pyrkhat ya kawa kammon ka Party u jied yow wanrah ya ki aiñ ki wow yarap ya ka jaitbru wa ki MDC kiwa ye wow yasaaid wei wow pynkup bor chooh chooh ha ki District Council.
Discussion about this post