U President ka Khasi Student’s Union (KSU), u Lambokstarwell Marngar da ong u wa i jia ha Shillong ym pu ya ryngkat wot tang wa i sñioohkhmat wa i yap yong ki 5 ngut ki waheh ha Mukroh. Da booh yukylli u wa kammon ong ki wa em i ktah yei suk i saaiñ ha Shillong, wei da pynrap wa kitu kiwa klam toh u booh ki ya idæ hei thaw kiwa ha-yung ha-sem yong ki 5 ngut yow sñiaw ki kammon.
Da ong u wa teiñ teiñ i jia ha Shillong da pynheh yow pynkulmar wei yahbakla neibhah kawon kawon ka seiñbhalang hawa pynman ki yei yakhih, ki pynman ki katkam ka hok paidbah. Tangwa uni u heh ka KSU da pdiang u leh wa ym ye wow len wa wa em heini heitai ki jia wa malu mala, tangwa ya kam kini da pynheh, katwa iyi wa jia ha khappood won da kset khlot.
U Marngar da ong u leh wa i yakhih u man ko ka yakhih, wei toh i kaamram yong ka sorkar wow kylli ya idæ wa ileh mih ka yakhih ha Shillong.
Hawa yatoh wa i kulmar wa da mih ha ka 24 tarik uni u bnai hadien ka yalang thang mombati wow sñiawlem ya kiwa da khlaad ha ki kuli ki pulit Assam, uwa yahkhmat ka KSU da ong u wa neidaw itai i jia, kiwa boon da chrai ki, tangwa kiwa boon ki bru wa da heh wa kiwa yahkhmat ki seiñbhalang da pynthanda wei da khang ki yeini, wei da pynrap u wa i thmu yong katai ka yalang toh wow phah ya ka khubor leh cha ka sorkar wa toh u chimkhia ki ya ini wa jia.
