U Montri ka sorkar jylla uwa pait ya ka chnat Tourism, u Paul Lyngdoh da ong u wa i Politics ka chongchit niam Hindu toh kawa da sdang wow tlep hapoh ka ri India kattu la kattu katni snem, wei pynsñiaw u wa man ko kayi kayi kawa sñiaw paarsnieh wa em ki bru kiwa pyrchang wow pynjngut ya ka suk ka saaiñ yong ka jylla.
Ini i klam u Paul toh yow beiñ ya u Akash Sagar uwa man uwa uiñke suwari uwa da kbai ‘Jai Shri Ram’ hapoh ka yungmane kawa em ha Mawlynnong, East Khasi Hils District.
“Nga beiñ O ya kam kini kiwa pyrchang wei kamjooh yei pyrchang yong kawi ka kynhun wow yoh psiah ha krem Mawjymbuiñ ha Mawsynram wow pynkylla kaam niam. Ini man ko du chibynta yong i yaleh pynngeit yabor ha ka niam Hindu iwa i hap i wow pyrchah”, da ong u Montri.
Da ong u leh wa ki kynhun yong ki Balang toh u man ki kiwa syndong noh wow chah u psiah ki bru cha ki thaw mane, deiwa e nongmuna wa cha kiwi ki ri em i pynrkhiñ wei bichaar bha ya kiwon kiwon chwa wow chah u psiah ki.
“Nga ngait O wa ini daw wai ko yei khmat yong ki kynhun kiwa chah ya kiwa wan uiñke suwari wow psiah ki, neibhah kam ini chong i hei por yong ki Balang”, da ong u.
“I u yieñ skem i wym e laad ya kiwon kiwon ki bru chit niam wow chim kabu deiwa wanrah leh i naam sih ya kani ka jylla yong i da kam kini ki kaam ki wym em i kitkhlieh”, da pynrap u Montri.
Hawa yatoh wa i e buit ka Hynñiewtrep Youth Council (HYC) wa ka sorkar toh u Register ko ya kiwa wan uiñke, u Paul da ong u wa kawi wa hap wow sñiawthooh wa ya ka kaam uiñke suwari hapoh ka jylla da mantre da ki chnong, katwa ka sorkar e yarap ko wow pynleh ya ki kaam pynroi.
“Kiwa boon ki thaw uiñke cha i toh kiwa pynlai da ki chnong, ki seiñ khynroo, ki Society. I bynta yong ka sorkar jylla toh du wow chna pynbha ha kitu ki thaw wei kamjooh leh wow pyntikna ya ka chong suk chong saaiñ. Tangwa ya kiwon ki wow chah u psiah man ko ka bynta kiwa pait wa pynlai wow pynkrehkaam da ki kyndon SOP”, da ong u Paul Lyngdoh.
Discussion about this post