Jowai: Ka khubor KJP Synod Mihngi kawa khadphra (XVIII) wada man haka 15 tarik u Wisu haka Balang Presbyterian Dkhiah, Khliehriat District, Rymbai Presbytery, wada saam da u Rev. S.S. Majaw heipor ka yaseiñ sngi, khut kyntu ko ya ki paaid wangait wow man ki kiwa chah chkoor yaka ktieñ u Blai wei kamjooh leh u bood wei wow leh yaka.
Ya kani ka khubor u Rev. S.S.Majaw da pynchong yurim u naka chithi chaki Hebru lynnong wa nyngkong dkhot wa 1 wa 2. Da ong kawi naka phang yong kani ka chithi klam ko heiyatoh i wan manbru u Jisu, wei kammon hei wan manbru da pyndep u yaki pyntipchwa ka Testament ka warim.
“Hanla wym ye u pyntikna yi wa thoh ya kani ka chithi, tangwa da pyntikna won wa uwi uwa thoh yaka toh uwa tipbha yaka kamjooh yei im u Jisu. Da ngait wada thoh haroh u ya kani ka chithi chaki Kristan yong ki Jew kiwa tipbha yei thoh wakhooid ka Testament warim, tangwa toh kiwa em hapyrdi i man synjor i ngait, wei da thoh khnang ya kani ka chithi neibynta u pynskem yei ngait yong ki”. Ong u Rev. S.S.Majaw.
Hawa pynchong yurim ya kani ka chithi u Rev. Majaw da pachat u yaki phang waki paaid wa ngait ka yaseiñ Synod u pyrkhat ki samen samen deiwa ong, “Kammon u Blai klam u ha kini ki sngi waki por wa katni, im i heipor yong i kylla wym kut de heiyatoh waki laad pathai khubor ha kylleiñ soodong ka pyrthai, wei lyngba i stat Science & Technology wailaad ko yaki bru u yaklam na kawi ka pyrthai cha kawi won, da yoo wa yoosar khlem ki laad pathai khubor wa katni wym ye de u im, lada mylliñ Mobile Phone hap uiñ biang i cha yung, wei kammon sñiaw chem chitom ki bru hawa chah khang Internet neiwa jia iwon iwon i kulmar. Ki khubor lai ki wei puræ i man ka sngi tangwa wym ye won i wow pynchong dor waka khubor wa u Blai em u wow klam ha nga wa ha phi”.
Da ong haroh u wa u Blai haki por nachwa klam u yaka ktien yong oo lyngba ki Prophet, ki syiem, ki Apostles wei dang pynemkam u ya kiwa chakri wow klam yaki bru hadooh kini ki sngi.
Da ong u leh wa im i haki sngi wa ki bei ki pa hap ki wow burom kylla yaki khon. Ka ktien u Blai hukum ko yaki khynroo khyllood wow burom u kohngooh ya ki waheh wei maya yaki jan yung kamwa maya yei idæ, tangwa ym em won man kamtæ. Kyntu haroh ko wow kup yei sñiawkhian wei chakri paralok neibhah u Blai yaleh pyrchah u ya kiwa sñiawheh. Hawa kamtæ man hi i mo kiwa leh næ kut du hei ap i sñiaw donhi yaka ktien u Blai? Da kylli u.
Ka kitab u Joshua 1:8 pynkynmoo ko wa kitæ kiwa sumaar wei leh yaka ktien u Blai kamwa da thoh haka u yoh ki yei roi i miat i bha hei lai luti. Em ki bru du neibynta u yoh nong hei kreh, chah pynchoi ki wow leh yeiyi yeiyi wym toh u leh wei ini man wada yooh yei bor sñiawlem wa em ha ki.
Ong u wa ka ktien u Blai khut ko ya i kiwa bood wow im hei sakhiat wei lyngba kam kani ka rynsan u chahchkoor yei bor sñiawlem, neibhah lada leh pyrchah yei bor sñiawlem wym ye u man i blooh wei che yaka pyrthai neibhah ki bru wa yoohbeiñ yei bor sñiawlem man ki kitæ ki bru wym em yurim hei im, chah pynkyruiñ i im yong ki kat chawa beh ka la-ær wot cha kiyi kiyi ki kaam sih wa pynsñiawsih tam yow Blai.
“Ki bru wa em i akor wa bha wei tip ya i hok, yoh ki i kyrkhu na u Blai lyngba ka rymaw, kitu kiwa im kyllaiñ wei yoohbeiñ yei hok wa sakhiat katkam ka aiñ Blai, ka rymaw wan ko heidur wow sih ki mar rep mar riang, wan ka kjut, chitom næ maad yei jinjar, neibhah katkam u Lukas 19:40, ka ktien u Blai klam ko lyngba i jia wada jia da man haka rymaw wa u Blai pynyoo u yei sñiawbha wei sñiawsih lyngba yong ka rymaw,” pynrap u Rev. S.S Majaw.
Kamtæ iwa jia haka rymaw khut ko yaka jaitbru wow pynbait yei im katkam ka aiñ longbru manbru wa u Blai da booh u haka pyrthai. Kiyi kiyi wajia haka rymaw em ki ka khubor wow klam yei im yong i.
Heyatoh weini ong u wa hadooh katni u Blai dang klam u, khut u yaka Balang wow man kawa lai kurim wa sakhiat yong oo, klam u yaki yung ki sem hawa yoo u yei jæd i pra, klam u yaki chnong ki thaw hawa em i eh i khoo i yachoon ne ya khajia, u Blai klam u man ka por ka khyllipmat. Em hi i mo ki chkoor wow sñiaw wei leh katkam ka ktien u Blai?
Discussion about this post