U Chief Executive Member ka Khasi Hills Autonomous District Council, u Titosstarwell Chyne da ong u wa lada ha Them Metor ye wow booh pulit waroh 24 kynta, iyi eh wow booh Outpost chipor ha khappood.
Ini i ong u CEM toh hadien wa da ap u yei ood ka Synjuk Rangbah Shnong Border Area hapoh ka Raid Nongtung yong ka Hima Khyrim, Ri-Bhoi kiwa da lai wow yachem ya oo ryngkat wa u MDC ka Mawhati, u Charles Marngar ynne ka sngi.
Hawa yatoh wa i yachem wa kiwa yahkhmat ka synjuk, u CEM da ong u wa ka sorkar toh u pyrkhat bha ko hajrong ini i bynta neibhah neiliang ka Assam da booh ko ya ki Outpost ha ki thaw wa ya kajia, wei lada ka Assam ka booh ko, iyi eh yaka Meghalaya wow boohlang neibynta i chngaaiñ ki bru yong i.
Ha iwi i liang, u CEM da pyntip u leh wa daw hiar u cha ka Raid Nongtung ha kini ki kajiak sngi wei wow wan pyntikna yei chngaaiñ kiwa chong chnong ha katai ka thaaiñ. Da pyntip leh wa daw pyrchang wow yachem leh ya u CEM ka Karbi Anglong Autonomous Council (KAAC) wow yaklam neibhah ki bru ka KAAC boonsien jooh lai wow tuklar ha kitai ki thaw.
Hawa yatoh wa ki khyrdop ka chnat khloo yong ka Assam, u Titos da ong u wa ka KHADC da pynkhreh ko wow booh lang ya kam kitai ki khyrdop, tangwa i pynbna yong ka sorkar wow khang noh ya waroh ki khyrdop yong ka KHADC, itai i kaam leh da kut noh.
