JHAD em naam ka Ri Jaiñtia,
Kylleiñ soodong i naam da bna.
Ka yung chna aiñ ki khon ka Ri,
Wa pait, wa ksoh yei hok, kynti.
JHAD em naam ka Ri Jaiñtia
Ileh cha yapha kamni wa jia?
Synchaar wa hok hapoh yong pha,
Daphet, da jngai, dalai tyrma.
I naam yong pha nadooh nachwa,
Hadooh katni wym wiar paya.
Yadung, yasooh, chidoh, chisnaam,
Hadooh datkoh waroh ki kaam.
Kat nangmih ki sngi ki por ki snem,
I suk, i saiñ hapha wym em.
Stiñ i pyrkhat kiwa chong hapoh yong pha,
Yap sep-ai ki khon ka Ri Jaiñtia.
Yoosar! wow yah ya pha ym em watip de,
Cha ka thong wa miat, watoh-watne.
Da yah synchaar ya pha sadu ki khwan donhi,
Kiwa im, miet-sngi hei yaknieh chuki.
JHAD em naam ki khon ka Ri
Hiar dor i burom yongpha dangmih ki sngi.
A! dathlah ki khmat, da sarom kiwa pait,
Hapoh yong pha yei synchaar katwa ngait.
Ish! dang em jabieñ hi mo wow pyrkhat yeini,
Dang em chkoor hi mo! wow sñiaw yei ood ki khon ka Ri ?
Dang em khmat hi mo! wa chynna u bichaar, u sylli;
Ya ka JHAD u yah cha ka thong deiwi?
Bichar khon ka Ri daphi
Hawa kamni yei yi u kdaw kti ?
Ya kiwa chong, wa synchaar hapoh,
Namo ya ki khon ka Ri waroh?
Discussion about this post