Deilang waka ri waroh kawi, ki bor District ka West Jaiñtia Hills da ya ksohkti lang ki yow lehkmen ya ka 13th National Voters’ Day ha JNV Mukhla, Mukhla hajrong ka phang “Nothing like Voting, I Vote for Sure”
Da ya emlang wa u Deputy Commissioner, u Batlang S Sohliya, ki Additional Deputy Commissioner, u M. A Challam, ka E L Warjri, ka HML Kynta, ki Assistant Commissioner, u S. Phanbuh wa u Wankhraw K Kharbuli.
Hawa e yei klam, neiliang u DC da kyntu ya kiwa thap Vote kiwa dang khynroo wow wan ki chakhmat wow chimbynta chongchit u thap Vote wow pynemkaam yei hok ki ha ka 27 tarik u bnai wow wan. Da ong u leh wa deiwa pynemkaam ya ka Vote yong i daw pynman ko ya ka synchaar paidbah kawa im wei yeini i hok wow thap Vote da man ko kam ka hok manbru wa da e da ka riti synchaar ka ri iwa da pynskem leh da ka Supreme Court neibynta uwi pa uwi uwa chong chnong ka India wa da em 18 snem chaneiñ.
U Deputy Commissioner da saam u leh ya ka Electoral Photo Identity Card (EPIC) cha ki 24 ngut kiwa man kam kiwa thap Vote thymme ka Mukhla.
Neiliang ki bor District da pynman ki leh ya u Amsa Freddy Khlem uwa man kyrpang (Person with Disabilities) kam u “Icon” neibynta kani ka Election wow wan yow pynchlur ya waroh kiwa da em Vote wow pynemkaam ki ya ka muhor ksiar yong ki wei da pynkup burom ya oo da u Additional Deputy Commissioner, u M.A. Challam ynne hi kam chibynta ka National Voters’ Day hapoh ka District.
Neiliang u Ansa Freddy Khlem, da pynchlur u ya kiwi kiwa em i duna hei doh i pran kiwa man kyrpang wow man ki kam kiwi wei wow lai thap leh ya ka Vote yong ki kam kiwa chong chnong ka ri.
Neiliang u Wankhraw K Kharbuli hawa e yei klam wai phang da ong u wa i thmu yong kani ka sngi toh wow pynsñiawthooh ya kiwa chong chnong yei hok yong ki u thap Vote katkam ka aiñ. Hadien ini da yahkhmat u wow puræ ya ka smai.
