U Chief Minister ka jylla, u Conrad K Sangma, ynne ka sngi da pteiñ u wow lai pait ya ki thaw wa chah ktah ha i chlai um ha Ri-loom Garo deiwa lai cha Chokpot Civil Sub-Division ha South Garo Hills.
Nyngkong da lai u ha Reni Badimagre, heiwa kawi ka yingkieñ doidoi ha ka wah Dareng wa pynyabi ya ka Reni Badimagre wa Bibragre da pat ko nei chlai um tangwa ym em chah ktah kiwa chong chnong ka Reni Badimagre nei chlai um.
Ha Mt. Carmel School hajan ka yaaw Chokpot hanla ym em u chah ktah nei chlai um lait na ki kot wa ki chuki, wei da lai pait u ya ki yung wa chah ktah ha Bibragre, Chokpot. Waroh da em 20 tylli ki manyung wa chah ktah wei 9 tylli ki yung wa da sih.
Ha Rongrakgre, u Conrad da yachem u wa ki 34 tylli ki manyung kiwa da chah ktah heiwa da em 24 tylli ki yung kiwa da chah pynsih wei da saam leh ki mar yarap cha waroh kiwa chah ktah.
Da yaklam u leh wa kiwa sah ha ki ar chnong wa chah ktah hei chlai um kiwa kynthup ya ka Gonganggre wa Danggilgre heiwa ha kini da em 27 tylli ki manyung wa da chah ktah wa 10 tylli ki yung wa da sih.
Da lai pait u leh ya ki 7 tylli ki manyung ha chnong Daramgre kiwa chah ktah heiwa 3 tylli ki yung toh kiwa da sih. Hadien won da lai pait u ya ka madan ka Daramgre kawa da dap khyndaw wa rah ka um.
Ha kani ka sngi da lai yachem u leh wa kiwa chah ktah ha Rongrikkimgre wei da pait u ya ka yingkieñ wa da chah rah kawa em ha ka wah Dareng wa pynyabi ya ka Rongrikkimgre wa ka Dikronggre.
Kani ka yingkieñ toh kawa chna da ka BADO da boon snem nachwa.
Discussion about this post