Ka 7 Wasa United hadien wa kut ka yalehke wa nyngkong yong ha ka Hero Futsal Club Championship da 2-2 pyrchah ya ka Tiddim Road Athletic Union (TRAU) ha ka 6 tarik wa da pynman ha Delhi, ynne ka 8 tarik da yachem ko waka Telongjem FC kawa na Nagaland.
Ha kani ka yalehke, ka 7 Wasa da jop suk ko da 8-2 ya ka Telongjem lyngba ki 3 kool na u Primrose Lamat.
Ka Telongjem da yoh wow thap kool nyngkong pyn ha ka minit wa 4 lyngba u M Sunep tangwa ha ka minit wa 7, u Niponghi Sumer da su kylliang u katwa ha ka jooh ka minit ka Telongjem da pyntam biang ko lyngba ka kool na u P Sunep kawa ym em da neh slem heiwa ka 7 Wasa haka jooh ka minit da su biang ko chi kool na u Wadajied Kynsai Ryngkhlem wei da ban biang sa ar kool lyngba u Primrose ha ka mini wa 14 wa ha ka minit wa 17 heiwa da kut ka yalehke da 4-2 ha ka kylla step.
Ha ka kylla miet, ka 7 Wasa da thap ko sa soo kool katwa ka Telongjem ym em de yoh ko wow thap.
U Primrose da thap biang u sa chi kool ha ka minit wa 26, u Riburom Jat chi kool ha ka minit wa 25 wa ar kool na u Samson Nongrum ha ka minit wa 29 wa 37.
Kiwa yalehke ka 7 Wasa ynne da pynyoo ki yei ryntih i rukom e bol wa i pynlai bol wei ki kool wa da yoh u thap kiwa boon toh kiwa yoosuk bha.
Ka 7 Wasa kattu da yoh ko 4 Point wei daw yachem ko waka Delhi kawa da dep yaleh chisien deiwa jop ya ka Telongjem da 16-06.
