Jop ka Aishwariya Malang yei naam Miss Jaiñtia Queen | Rs. 3 lak yarap poisa u Paul Lyngdoh cha ka Khliehiongriang S&CC

Ha ka yakob miat kynthai wa tip kam ka 1^st Miss Jaiñtia Queen wa pynman da ka Khliehiongriang Social & Cultural Club, Jowai ha ka 12 tarik uni u bnai ha District Library Auditorium, Mynthong, ka Aishwariya Malang da man ko kawa jop hakhlieh tam deiwa yoh sap ya ka pansnget Miss Jaiñtia Queen napyrdi ki 13 ngut kiwa wan chimbynta.

Ka Aishwariya Malang najrong i naam Miss Jaiñtia Queen, da yoh rah ko leh hadooh le tylli ki Sub Title wa kynthup ya ka Miss Popular, Miss Talented wa Miss Photogenic.

Kawa yoh 1st Runner Up toh ka Dorachwa Daw kawa da yoh u rah leh ya ka Sub Title Miss Personality, katwa ka Ephida Ymbon kawa yoh rah yei naam 2nd Runner Up da yoh ko leh yei naam Smiling Queen.

Kiwi won ki Sub Title kam i naam Miss Perfect 10 da yoh ka Isadella Bareh, Best in Ramp Walk da yoh ka Firstin Roy Kam, katwa yei naam Fashion Icon da yoh ka Rimika Dkhar.

Related posts

Jop ka Miss Thailand yei naam Miss World 2025 kawa da pynman ha India

May 31, 2025

Hap rah tarik yei pynkhle ya ka Lucky Draw ka chnong Moopala

May 31, 2025

Chwa u sdang ya kani ka yakob da em ka yalang tbian wow wai ya kani ka rynsan da u Paul Lyngdoh, Montri ka chnat Arts & Culture, Tourism wa kiwi uwa da wan sakhi kam u kongsan hei emlang u Phasmon Dkhar, MDC ka JHADC, u Nehemayah Tyngkan wa kiwi de.

U waheh chnong ka Khliehiongriang, u K. Ladia hawa klam yahkhmat khana u wa i pynman ya kani ka rynsan yakob toh yow pynmih poisa heiyatoh i chna ya ka Community Hall kawa dang boon i dawa khnang wa ha kani ka Hall ki khon ka chnong u yoh ki u yachemlang wei u pyndep boon ki kaam neibynta i bha i miat ki khon khynroo khyllood ka chnong waka imlang sahlang kamjooh.

Neiliang u Paul Lyngdoh hawa yaroh ya kani ka luti wa da chim ka Khliehiongriang, pachat u leh ki kyntien e mynsien ya ki khyllood wa chimbynta deiwa ong, i miat dur man i iwa tam bar yei sniehdoh, iwa mut hawa chimbynta ha kam kani ka yakob toh u kynmoo wa i miat dur wym mut du ya iwa ye u chynna cha lait, tangwa i yumut wa sakhiat yong i miat toh iwa wan napoh, wei iwa neh rta katwa u bru næ ka bru dang im ki, katwa iwa miat dur wa cha lait won neh i katkam i rta.

Hawa em yei miat dur wa wan napoh, paaw chynna i lyngba ki kaam, ki rukom klam, i rukom manbru wa iwa myllien, da ong u.

Ha kani ka sngi u Paul Lyngdoh da e yarap haroh u Rs. 3 lak cha ka Khliehiongriang Social & Cultural Club, Jowai.