Ha ka lympung yalehbol ‘Friendly Match’ wa pynman da ka Sports & Youth Sub-Committee ka War Jaiñtia Student Union (WJSU) ha ka 27 tarik uni u bnai ha madan League (Shinglamin Ryngksai) wa em ha Dawki, ka Amlarem SC ka Champion 2025 yong ka War Jaiñtia da pynrem ko ya ka Langsning FC, Shillong da 3-0.
Ya ki kool ka Amlarem SC da thap da u Marshal Nongrum ha ka minit wa 37 wa 39 katwa u Pdianghun Suting ha ka minit wa 52.
Ya ka Langsning da yahkhmat da u Head Coach yong ka u Khainpyrkhat Syiemlieh katwa ya ka Amlarem SC won da yahkhmat da u President ka Club, u Dikermen Surong.
Chwa wow sdang ya ka lympung yalehke da wan wai pyrda da u Henry Manner, President ka War Jaiñtia Owner & Drivers Truck Association Amlarem kam u kongsan, u Army Lipon, President Synjuk Waheh Chnong Ri Jaiñtia kam u symbood kongsan, u Phrangki Buam uwa yalehbol wa bna naam ka War Jaiñtia uwa man leh uwa yalehke ka Indian League kam u Special Guest, najrong kiwi won ki bru wa rap bna dur bna dar ka thaaiñ War Jaiñtia.
Ha ka yalang tbian wa pynlai da u Autumn Sumer, Senior Vice President ka seiñ, da yoh i klam na u Everest R Langstang, General Secretary WJSU, uwa da pynsñiaw i sñawngooh ya ki bor pynlai ka Langsning FC kiwa da bien u wan chimbynta ha kani ka yalehke yong lok deiwa yooluti wow yoh mynsien kiwa yalehke ka thaaiñ War.
Da ong haroh u wa ka seiñ u kreh borbah ko yow pynku ya ka thaaiñ ha waroh ki liang lada poi u pood wow yakhih namo wot u chong patok, wei ka yurim yong ka ym du ya ki bru ka thaaiñ Amlarem Civil Sub-Division tangwa ha kiwon kiwon ki bynta ka jylla wa ka pyrthai.
U Army Lipon hawa e yei klam da yaroh u yei kreh chitom ka WJSU wei da e mynsien u wow nang minot chooh chooh ko wow e chakri ya ka thaaiñ.
U Phrangki Buam won da e mynsien u ya kiwa yalehke deiwa ong u kani ym du wa man ko ka yalehke wa yarap yei chait i khiah hei doh i pran tangwa man ko leh ka laad kamai yow im ja.
Neiliang u Henry Manner, kam u kongsan yong kani sngi kyntu u ya kiwa chimbynta ha kani ka lympung yalehke wow em ki i mynsien yalehke kamjooh i akor burom wei wow kiar leh nei dih pynmuaid khnang yow ku hei im.
Ha kani ka jooh ka sngi u Dei Syad, Chairman ka Sports & Youth Sub-Committee chim u leh ka kabu wow pynbna wa neiliang ka Sports and Youth Sub-Committee ka seiñ daw pynman ko ya ka First War Jaiñtia Junior Championship Under-16 Football Tournament 2025 ha chnong Pamtbuh Amlarem Civil Sub-Division haka tayaaw wa khaddooh u bnai October 2025.
Da pyntipleh wa daw pdiang 8 tylli ki Team na kawi kawi ka thaaiñ yong 4 tylli ki thaaiñ ka War Jaiñtia.
Wei na kini daw jied won 32 ngut kiwa yalehke wa biang tam yow phah pynpliah cha ka SAI Training Centre, NEHU Campus, Shillong khnang yow ye ki u pynwandur ya ka mynried yong ki lyngba kani ka sap wei yow im ja.
Discussion about this post