Ka Mih-Myntdu Community Social Welfare Association (MCSWA), Khliehriat chirup i yakrehlang waka Meghalaya AIDS Control Society (MACS), Shillong deilang ka District Legal Services Authority (DLSA), East Jaiñtia Hills District, ynne ka sngi da leh burom ki ya ka World AIDS Day ha Khliehriat West Community Hall, Khliehriat East Jaiñtia Hills District hajrong ka phang wa ong “Take the Right Path”.
Ha kani ka sngi u Aditya Verma, SDO Sardar, East Jaiñtia Hills District, da man u kam u kongsan hei emlang u Dr. D. Shylla DM&HO, East Jaiñtia Hills, u Dr. J. Nongtdu, Medical & Health Officer OST Centre, East Jaiñtia Hills District, u Dr. D. Nongpluh, Medical Officer In-Charge ICTC, u P.N. Swer, Panel Lawyer DLSA, East Jaiñtia Hills District, u Aris J Nongkynrih, Chief Functionary MCSWA, u Ajoy Lanong, Deputy Director Mainstreaming MACS najrong kiwa yahkhmat chnong, ki ASHA ki Self Help Group na ki chnong waphær waphær wa kiwi ha ka yalang wa pynlai da ka Rinibeth Patlong, Programme Manager, Mihmyntdu Community Social Welfare Association (MCSWA), TI CC Khliehriat.
Ki Doctor wa e yei klam ha kani ka sngi da pynche ki hajrong u khñiang kjut HIV/AIDS wei kammon poor wei ktah u yei doh i pran u bru kamjooh yei pyrkhat pyrdaiñ kiwa yoh ya uni u khñiang. Da kyntu haroh ki wow kiar nei chongkha kulmar, i ngop dih drugs neibhah kani toh ka luti wa suk wow smat poor bha uni u khñiang.
Heijooh i por kyntu ki wow wan chakhmat neibynta u phah Test ya idæ wei wow dih dawai tikna leh khnang wa uni u khñiang u tlotbor u.
U Aditya Verma kam u kognsan hawa klam hajrong ka phang “Take the Right Path”, ong u khnang yow ye u pyndooh pyndam ya uni u khñiang kjut emkaam wow e i stat i chemphang wei pynkupbor ya ki khon khynroo khyllood neibynta u mih lai pynsñiawthooh paidbah ki, emkaam leh u pynyoh i chakri wa yatoh wei chait i khiah cha waroh lang, u pynsñiawthooh leh ya kiwa chong chnong hajrong wow pyndooh pyndam i yoobeiñ ya ki bru wa yoh ya uni u khñiang kjut.
Wei kamwa ka thong hi ka Joint United Nations Programme on HIV/AIDS (UNAIDS) u pyndooh pyndam ya uni u khñiang hapoh u snem 2030, kyntu u ya ka chnat i chait i khiah ka District wow pteiñ chakri ki khlem ngiah khnang wa ki bru u yoh ki yei chakri wa paka.
Ha kani ka sngi da em leh ka Drama tbian na ki VO ka Lad Rymbai Dongwah, neitæ ka yakob Extempore Speech hajrong ka phang HIV/AIDS wa da chimbynta da ki ASHA na ki chnong waphær, wei napyrdi kini ki ASHA kawa yoh rah naam jop toh ka Gracebedel Rymbai ka ASHA yong ka Ladrymbai kawa klam pynche hajrong u Condom deiwa ong ha ka juk katni uni u tiar ye u leh wow e yada hadooh soo bynta itæ yow lait nei punkhon, yow lait yabi kjut HIV, i kjut STD wa Hepatitis.
Kamtæ kyntu ko wa toh u pynemkaam bait ya u Condom khnang yow lait nei maa.
Discussion about this post