Khliehriat: Ka Dong Main Road FC wa ka Dong Khadlynraaw toh ki artylli ki dhah wajop ha ka sngi sdang yong ka Lympung Yalehke kawa tip kam “Umlyngsha Football League 2018” kawa pynman da ka Umlyngsha Youth Society And Sports Club (UYSSC), Khliehriat, East Jaiñtia Hills ha Umlyngsha Football Playground da sdang ya ka ha ka 4 tarik uni u bnai.
Ha ka yakhun wa nyngkong heipor 2:00 waje nohchariñ ka sngi ka Dong MR RBBJ da jop ko ya ka Dong East Colony da 3-1 heiwa ka kool wa nongkong da yoh u thap lyngba u Daplin Lamare yong ka Dong East FC ha ka minit 12 tangwa ka liang pyrchah da yoh ko u su kylliang du hapoh ka minit wa 28 lyngba u Coming Rymbai heiwa ka kylla step da kut ko mar 1-1.
Hawa sdang ka kylla miet, ka Dong MR da pyrchang ko u yakhun wow yoh chooh u thap wei ha ka minit wa 48 da yoh biang ko u thap lyngba u Aristone Suchiang wei da da thap biang u ha chwa wow kut ka yalehke.
Ha ka yakhun wa ar won, ka Dong Khadlynraw FC da jop ko da 3-0 pyrchah ya ka Dong Loompyrdi heiwa ki ar kool da chah thap ko ha ka kylla step lyngba u Prosper Amkhloo wa u Shaniah Suchen ha ka minit wa 18 wa 26 wei ha ka kylla miet won ka Dong Khadlynraw FC da yoh biang ko sa kawi ka kool chwa wow kut ka por yalehke lyngba u Shaniah Suchen.
Kani toh katkam ka khubor kawa pyllait lyngba u Namphrangmi L Talang, Secretary UYSSC, East Jaiñtia Hills.
Discussion about this post